ਜਲੰਧਰ – ਭਾਰਤੀ ਰਿਜ਼ਰਵ ਬੈਂਕ (ਆਰ. ਬੀ. ਆਈ.) ਵੱਲੋਂ ਰੈਪੋ ਰੇਟ ਘਟਾਉਣ ਤੋਂ ਬਾਅਦ ਬੈਂਕਾਂ ਨੇ ਹੋਮ ਲੋਨ ’ਤੇ ਵਿਆਜ ਘਟਾਉਣਾ ਸ਼ੁਰੂ ਕਰ ਦਿੱਤਾ ਹੈ। ਹੁਣ ਦੇਸ਼ ਦੇ 6 ਵੱਡੇ ਬੈਂਕਾਂ ਨੇ ਹੋਮ ਲੋਨ ’ਤੇ ਵਿਆਜ ਘਟਾ ਦਿੱਤਾ ਹੈ।
ਆਰ. ਬੀ. ਆਈ. ਨੇ 7 ਫਰਵਰੀ ਨੂੰ ਆਪਣੀ ਮੁਦਰਾ ਨੀਤੀ ਕਮੇਟੀ (ਐੱਮ. ਪੀ. ਸੀ.) ਦੀ ਮੀਟਿੰਗ ਵਿਚ ਰੈਪੋ ਰੇਟ ਵਿਚ 25 ਬੇਸਿਸ ਪੁਆਇੰਟ ਭਾਵ 0.25 ਫੀਸਦੀ ਦੀ ਕਟੌਤੀ ਕੀਤੀ ਹੈ। ਇਸ ਨਾਲ ਇਹ ਘੱਟ ਕੇ 6.25 ਫੀਸਦੀ ਹੋ ਗਿਆ ਹੈ, ਜਦਕਿ ਪਿਛਲੇ 2 ਸਾਲਾਂ ਵਿਚ ਇਹ ਦਰ ਸਥਿਰ ਸੀ। ਆਰ. ਬੀ. ਆਈ. ਦੇ ਇਸ ਫੈਸਲੇ ਨਾਲ ਕੇਨਰਾ ਬੈਂਕ, ਪੰਜਾਬ ਨੈਸ਼ਨਲ ਬੈਂਕ, ਯੂਨੀਅਨ ਬੈਂਕ ਆਫ ਇੰਡੀਆ ਅਤੇ ਬੈਂਕ ਆਫ ਬੜੌਦਾ ਸਮੇਤ ਕਈ ਬੈਂਕਾਂ ਨੇ ਵੀ ਆਪਣੇ ਰੈਪੋ ਲਿੰਕਡ ਲੈਂਡਿੰਗ ਰੇਟ (ਆਰ. ਐੱਲ. ਐੱਲ. ਆਰ.) ਵਿਚ 0.25 ਫੀਸਦੀ ਦੀ ਕਟੌਤੀ ਕੀਤੀ ਹੈ। ਰੈਪੋ ਲਿੰਕਡ ਲੈਂਡਿੰਗ ਰੇਟ ਉਹ ਰੇਟ ਹੁੰਦੇ ਹਨ, ਜਿਸ ’ਤੇ ਬੈਂਕ ਗਾਹਕਾਂ ਨੂੰ ਕਰਜ਼ਾ ਦਿੰਦੇ ਹਨ। ਇਹ ਦਰ ਸਿੱਧੇ ਆਰ. ਬੀ. ਆਈ. ਦੀ ਰੈਪੋ ਦਰ ਨਾਲ ਜੁੜੀ ਹੁੰਦੀ ਹੈ।
ਕੇਨਰਾ ਬੈਂਕ ਨੇ ਆਪਣੇ ਆਰ. ਐੱਲ. ਐੱਲ. ਆਰ. ਨੂੰ 9.25 ਤੋਂ ਘਟਾ ਕੇ 9.00 ਫੀਸਦੀ ਕਰ ਦਿੱਤਾ ਹੈ। ਬੈਂਕ ਆਫ ਬੜੌਦਾ ਨੇ ਆਪਣੀ ਵਿਆਜ ਦਰਾਂ ਨੂੰ ਸੋਧ ਕੇ 8.90 ਫੀਸਦੀ ਕਰ ਦਿੱਤਾ ਹੈ। ਬੈਂਕ ਆਫ ਇੰਡੀਆ ਨੇ ਆਪਣੀ ਆਰ. ਐੱਲ. ਐੱਲ. ਆਰ. ਨੂੰ 9.10 ਤੇ ਯੂਨੀਅਨ ਬੈਂਕ ਆਫ ਇੰਡੀਆ ਨੇ 9.25 ਤੋਂ ਘਟਾ ਕੇ 9 ਫੀਸਦੀ ਕਰ ਦਿੱਤਾ ਹੈ। ਜਦੋਂ ਕਿ ਇੰਡੀਅਨ ਓਵਰਸੀਜ਼ ਬੈਂਕ ਨੇ ਆਪਣੇ ਆਰ. ਐੱਲ. ਐੱਲ. ਆਰ. ’ਚ 25 ਬੇਸਿਸ ਪੁਆਇੰਟ ਦੀ ਕਟੌਤੀ ਕੀਤੀ ਹੈ, ਜਿਸ ਨਾਲ ਇਹ 9.35 ਤੋਂ ਘੱਟ ਕੇ 9.10 ਫੀਸਦੀ ਹੋ ਗਿਆ ਹੈ। ਜਦੋਂ ਕਿ ਪੀ. ਐੱਨ. ਬੀ. ਨੇ ਵੀ ਆਪਣੀ ਆਰ. ਐੱਲ. ਐੱਲ. ਆਰ. ਨੂੰ 9.25 ਤੋਂ ਘਟਾ ਕੇ 9.00 ਫੀਸਦੀ ਕਰ ਦਿੱਤਾ ਹੈ।
