ਕਰਨਵੀਰ ਸਿੰਘ, ਨੈਸ਼ਨਲ ਟਾਈਮਜ਼ ਬਿਊਰੋ :- ਅੱਜ ਸ਼੍ਰੋਮਣੀ ਅਕਾਲੀ ਦਲ ਦੇ 567 ਡੈਲੀਗੇਟਸ ਵੱਲੋਂ ਇਕ ਵਾਰ ਫਿਰ ਸੁਖਬੀਰ ਸਿੰਘ ਬਾਦਲ ਨੂੰ ਸਰਬ ਸਹਿਮਤੀ ਨਾਲ ਮੁੜ ਪਾਰਟੀ ਪ੍ਰਧਾਨ ਚੁਣ ਲਿਆ ਗਿਆ, ਪਰ ਇਹ ਚੋਣ ਸਿਰਫ਼ ਇੱਕ ਰਵਾਇਤੀ ਕਾਰਵਾਈ ਨਹੀਂ ਰਹੀ। ਇਹ ਮੁੜ ਚੋਣ ਪੰਥਕ ਹਲਕਿਆਂ ਵਿੱਚ ਕਈ ਵੱਡੇ ਸਵਾਲਾਂ ਨੂੰ ਜਨਮ ਦੇ ਰਹੀ ਹੈ।
ਪਹਿਲਾ ਸਵਾਲ: ਕੀ ਅਕਾਲ ਤਖ਼ਤ ਦੇ ਆਦੇਸ਼ਾਂ ਦੀ ਹੋ ਰਹੀ ਉਲੰਘਣਾ?
ਸੁਖਬੀਰ ਬਾਦਲ ਉਹੀ ਨੇ, ਜਿਨ੍ਹਾਂ ਨੂੰ ਪੰਥਕ ਢਾਂਚਿਆਂ ਅਤੇ ਸੰਗਤ ਵੱਲੋਂ ਪਿਛਲੇ ਕਈ ਸਾਲਾਂ ਦੌਰਾਨ ਤਿੱਖੇ ਸਵਾਲਾਂ ਦਾ ਸਾਹਮਣਾ ਕਰਨਾ ਪਿਆ। 2015 ਦੇ ਬੇਅਦਬੀ ਕਾਂਡਾਂ ਤੋਂ ਲੈ ਕੇ ਅਕਾਲ ਤਖ਼ਤ ਸਾਹਿਬ ਦੇ ਫੈਸਲੇ ਤੱਕ, ਜਿੱਥੇ ਉਨ੍ਹਾਂ ਨੂੰ ਅਯੋਗ ਕਰਾਰ ਦਿੱਤਾ ਗਿਆ ਸੀ, ਕੀ ਉਹ ਸਾਰੇ ਮਸਲੇ ਹੱਲ ਹੋ ਗਏ? ਜਾਂ ਅਕਾਲੀ ਦਲ ਨੇ ਪੰਥਕ ਮੱਨੋਰਥਾਂ ਦੀ ਥਾਂ ਸਿਆਸੀ ਗਣਤੰਤਰ ਨੂੰ ਤਰਜੀਹ ਦੇਣ ਦਾ ਫੈਸਲਾ ਕਰ ਲਿਆ ਹੈ?
ਦੂਜਾ ਸਵਾਲ: ਅਯੋਗ ਕਰਾਰ ਦਿੱਤੇ ਗਏ ਲੀਡਰ ਨੂੰ ਮੁੜ ਪ੍ਰਧਾਨ ਬਣਾਉਣਾ ਕਿਹੜੀ ਜਥੇਦਾਰੀ ਦੀ ਨਿਸ਼ਾਨੀ?
ਜੇਕਰ ਅਕਾਲੀ ਦਲ ਖੁਦ ਨੂੰ ਕੌਮ ਦੀ ਜਥੇਬੰਦੀ ਦੱਸਦਾ ਹੈ, ਤਾਂ ਫਿਰ ਉਹ ਅਕਾਲ ਤਖ਼ਤ ਦੇ ਆਦੇਸ਼ਾਂ ਨੂੰ ਕਿੰਨੀ ਅਹਿਮੀਅਤ ਦਿੰਦਾ ਹੈ? ਜੇ ਇਕ ਵਾਰ ਕਿਸੇ ਨੂੰ ਪੰਥਕ ਪੱਧਰ ‘ਤੇ ਅਣਮਨਜ਼ੂਰ ਕੀਤਾ ਗਿਆ ਸੀ, ਤਾਂ ਕੀ ਬਿਨਾਂ ਕਿਸੇ ਸਰਵਜਨਿਕ ਖੇਦ ਜਾਂ ਪਾਸ਼ਚਾਤਾਪ ਦੇ ਉਹ ਮੁੜ “ਯੋਗ” ਹੋ ਗਿਆ?
ਤੀਜਾ ਸਵਾਲ: ਕੀ ਅਕਾਲੀ ਦਲ ਅਜੇ ਵੀ ਪੰਥ ਦੀ ਆਵਾਜ਼ ਹੈ ਜਾਂ ਸਿਰਫ਼ ਇਕ ਪਰਿਵਾਰਕ ਪਾਰਟੀ?
ਸੁਖਬੀਰ ਬਾਦਲ ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ ਕਿ ਅਕਾਲੀ ਦਲ ਕਿਸੇ ਪਰਿਵਾਰ ਦੀ ਨਹੀਂ, ਪੰਥ ਦੀ ਪਾਰਟੀ ਹੈ। ਪਰ ਜਿੱਥੇ ਚੋਣ ਤੋਂ ਪਹਿਲਾਂ ਕਿਸੇ ਹੋਰ ਉਮੀਦਵਾਰ ਦਾ ਮਤਾ ਪੇਸ਼ ਨਹੀਂ ਕੀਤਾ ਗਿਆ, ਤੇ ਹਰ ਵਾਰੀ ਇਕੋ ਵਿਅਕਤੀ ਦੇ ਨਾਂ ’ਤੇ ਸਰਬਸੰਮਤੀ ਬਣ ਜਾਂਦੀ ਹੈ — ਕੀ ਇਹ ਵਾਸਤਵ ਵਿੱਚ ਲੋਕਤੰਤਰ ਹੈ ਜਾਂ ਇਕ ਪਰਿਵਾਰਕ ਹਕੂਮਤ ਦੀ ਛਾਪ?
ਚੌਥਾ ਸਵਾਲ: ਕੀ ਇਹ ਚੋਣ ਪੰਥਕ ਨਵੀਨੀਕਰਨ ਜਾਂ ਪੁਰਾਣੀ ਰਾਜਨੀਤੀ ਦੀ ਮੋਹਰ?
ਪੰਥ ਨੂੰ ਅੱਜ ਇੱਕ ਨਵੀਨ ਲੀਡਰਸ਼ਿਪ, ਇੱਕ ਤਾਜ਼ੀ ਸੋਚ, ਅਤੇ ਨਿਰਭਰਤਾ ਦੀ ਲੋੜ ਹੈ। ਪਰ ਅਕਾਲੀ ਦਲ ਵੱਲੋਂ ਮੁੜ ਇੱਕ ਵਿਵਾਦਤ ਅਤੇ ਅਸਵੀਕਾਰ ਕੀਤੇ ਚਿਹਰੇ ਨੂੰ ਆਗੂ ਬਣਾਉਣਾ, ਕੀ ਇਹ ਪੰਥ ਨੂੰ ਅੱਗੇ ਲਿਜਾਣਾ ਹੈ ਜਾਂ ਵਾਪਸ ਇੱਕ ਖਾਸ ਯੁੱਗ ਦੀ ਗਲੀਆਂ ‘ਚ ਫੇਰਨਾ?
ਸੁਆਲਾਂ ਤਾਂ ਬਹੁਤ ਨੇ, ਪਰ ਜਵਾਬ…?
ਪੰਥ ‘ਚ ਜਿਵੇਂ ਹੀ ਇਹ ਚੋਣੀ ਖ਼ਬਰ ਗੂੰਜੀ, ਹੋਰ ਜਥੇਬੰਦੀਆਂ ਅਤੇ ਨਿਰਪੱਖ ਸਿੱਖ ਆਲਮੀ ਅਦਾਰੇ ਇਸ ‘ਤੇ ਆਪਣੀ ਪ੍ਰਤਿਕਿਰਿਆ ਦੇਣਗੇ — ਪਰ ਹੁਣ ਵਾਅਦੇ ਨਹੀਂ, ਹਕੀਕਤਾਂ ਦੀ ਲੋੜ ਹੈ। ਅਕਾਲੀ ਦਲ ਨੂੰ ਪੰਥ ਦੀ ਜਥੇਬੰਦੀ ਕਹਿਣ ਤੋਂ ਪਹਿਲਾਂ, ਉਸਨੂੰ ਅਕਾਲ ਤਖ਼ਤ ਅਤੇ ਸੰਗਤ ਦੇ ਫ਼ੈਸਲਿਆਂ ਨੂੰ ਲਾਗੂ ਕਰਨਾ ਪਵੇਗਾ, ਨਹੀਂ ਤਾਂ ਇਹ ਸਵਾਲ ਹਮੇਸ਼ਾ ਉੱਠਦੇ ਰਹਿਣਗੇ।
ਸੁਖਬੀਰ ਬਾਦਲ ਨੂੰ ਮੁੜ ਪ੍ਰਧਾਨ ਬਣਾਉਣ ਨਾਲ ਅਸਲ ‘ਚ ਕੌਣ ਜਿੱਤਿਆ — ਪੰਥ ਜਾਂ ਪਰਿਵਾਰ ?
ਆਪਣੀ ਰਾਇ comment ਸੈਕਸ਼ਨ ਚ ਜ਼ਰੂਰ ਸਾਂਝੀ ਕਰੋ।
