ਨੈਸ਼ਨਲ ਟਾਈਮਜ਼ ਬਿਊਰੋ :- ਭਾਰਤ ਦੇ ਆਰਮੀ ਚੀਫ਼ ਜਨਰਲ ਉਪੇਂਦਰ ਦਿਵੇਦੀ ਨੇ ਪਾਕਿਸਤਾਨ ਵੱਲੋਂ ‘ਆਪ੍ਰੇਸ਼ਨ ਸਿੰਦੂਰ’ ਵਿੱਚ ਕਥਿਤ ਜਿੱਤ ਦੇ ਦਾਵਿਆਂ ਨੂੰ “ਜੰਗ-ਮੈਦਾਨੀ ਹਕੀਕਤ ਨਹੀਂ, ਸਗੋਂ ਕਹਾਣੀ ਘੜਨ ਦੀ ਕਲਾ” ਕਰਾਰ ਦਿੱਤਾ ਹੈ। ਆਈ.ਆਈ.ਟੀ. ਮਦਰਾਸ ਵਿੱਚ ਇਕ ਪ੍ਰੋਗਰਾਮ ਦੌਰਾਨ ਗੱਲ ਕਰਦੇ ਹੋਏ ਉਨ੍ਹਾਂ ਨੇ ਇਸ ਆਪ੍ਰੇਸ਼ਨ ਦੀ ਤੁਲਨਾ ਇਕ ਉੱਚ-ਪੱਧਰੀ ਸ਼ਤਰੰਜ ਮੁਕਾਬਲੇ ਨਾਲ ਕੀਤੀ, ਜਿੱਥੇ ਵਿਰੋਧੀ ਦੇ ਅਗਲੇ ਕਦਮ ਦੀ ਅਣਸ਼ਚੀਤਾ ਨੇ ਭਾਰਤੀ ਫੌਜ ਨੂੰ ਹਮੇਸ਼ਾਂ ਸਤਰਕ ਰੱਖਿਆ।
ਜਨਰਲ ਦਿਵੇਦੀ ਨੇ ਕਿਹਾ, “ਆਪ੍ਰੇਸ਼ਨ ਸਿੰਦੂਰ, ਰਵਾਇਤੀ ਜੰਗ ਤੋਂ ਥੋੜ੍ਹਾ ਘੱਟ, ਇਕ ‘ਗ੍ਰੇ ਜ਼ੋਨ’ ਸ਼ਤਰੰਜ ਵਰਗਾ ਸੀ। ਅਸੀਂ ਆਪਣੀ ਚਾਲ ਚਲਦੇ ਸੀ, ਉਹ ਆਪਣੀ। ਕਈ ਵਾਰ ਅਸੀਂ ਚੈਕਮੇਟ ਦਿੱਤਾ, ਕਈ ਵਾਰ ਸਿੱਧਾ ਵਾਰ ਕੀਤਾ, ਖ਼ਤਰਾ ਜਾਣਦੇ ਹੋਏ ਵੀ।”
ਇਹ ਮੁਹਿੰਮ 7 ਮਈ ਨੂੰ ਪਹਲਗਾਮ ਦੇ ਆਤੰਕੀ ਹਮਲੇ — ਜਿਸ ਵਿੱਚ 26 ਨਾਗਰਿਕਾਂ ਦੀ ਜਾਨ ਗਈ ਸੀ — ਦੇ ਜਵਾਬ ਵਿੱਚ ਸ਼ੁਰੂ ਕੀਤੀ ਗਈ ਸੀ। ਆਪ੍ਰੇਸ਼ਨ ਦਾ ਨਿਸ਼ਾਨਾ ਪਾਕਿਸਤਾਨ ਅਤੇ ਪਾਕਿਸਤਾਨ ਕਬਜ਼ੇ ਵਾਲੇ ਕਸ਼ਮੀਰ ਵਿੱਚ ਆਤੰਕੀ ਠਿਕਾਣੇ ਅਤੇ ਢਾਂਚੇ ਸਨ। ਹਵਾਈ ਹਮਲਿਆਂ ਅਤੇ ਮਿਸਾਈਲ ਹਮਲਿਆਂ ਰਾਹੀਂ ਸਟੀਕ ਕਾਰਵਾਈ ਕਰਨ ਤੋਂ ਪਹਿਲਾਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਅਤੇ ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨਾਲ ਉੱਚ-ਪੱਧਰੀ ਮੀਟਿੰਗਾਂ ਹੋਈਆਂ। ਜਨਰਲ ਦਿਵੇਦੀ ਅਨੁਸਾਰ, ਸਰਕਾਰ ਵੱਲੋਂ ਦਿੱਤੀ ਗਈ ਸਪਸ਼ਟ ਰਾਜਨੀਤਿਕ ਦਿਸ਼ਾ ਅਤੇ ਫੌਜ ਨੂੰ ਪੂਰੀ ਛੂਟ ਮਿਲਣਾ, ਇਸ ਕਾਰਵਾਈ ਦੀ ਸਫਲਤਾ ਦਾ ਮੁੱਖ ਕਾਰਨ ਸੀ।ਉਨ੍ਹਾਂ ਯਾਦ ਕਰਵਾਇਆ, “ਪਹਿਲੀ ਵਾਰ ਅਸੀਂ ਇੰਨੀ ਸਪਸ਼ਟ ਰਾਜਨੀਤਿਕ ਹਦਾਇਤ ਵੇਖੀ। ਰੱਖਿਆ ਮੰਤਰੀ ਨੇ ਸਾਫ਼ ਕਿਹਾ, ‘ਹੁਣ ਬੱਸ।’ ਤਿੰਨਾਂ ਫੌਜੀ ਮੁਖੀਆਂ ਨੇ ਸਹਿਮਤੀ ਜਤਾਈ ਕਿ ਕੋਈ ਫੈਸਲਾਕੁੰਨ ਕਾਰਵਾਈ ਲਾਜ਼ਮੀ ਹੈ, ਤੇ ਮਨਜ਼ੂਰੀ ਤੁਰੰਤ ਮਿਲ ਗਈ।”ਪਾਕਿਸਤਾਨ ਵੱਲੋਂ ਆਪਣੇ ਆਰਮੀ ਚੀਫ਼ ਜਨਰਲ ਆਸਿਮ ਮੁਨੀਰ ਨੂੰ ਮਾਨਦ ਪੰਜ-ਤਾਰਿਆਂ ਵਾਲਾ ਫ਼ੀਲਡ ਮਾਰਸ਼ਲ ਦਰਜਾ ਦੇਣ ‘ਤੇ ਵੀ ਜਨਰਲ ਦਿਵੇਦੀ ਨੇ ਚੋਟ ਕੀਤੀ। ਉਨ੍ਹਾਂ ਕਿਹਾ, “ਜੇ ਤੁਸੀਂ ਕਿਸੇ ਪਾਕਿਸਤਾਨੀ ਨੂੰ ਪੁੱਛੋ ਕਿ ਉਹ ਜਿੱਤੇ ਜਾਂ ਹਾਰੇ, ਉਹ ਫ਼ੀਲਡ ਮਾਰਸ਼ਲ ਦੇ ਦਰਜੇ ਵੱਲ ਇਸ਼ਾਰਾ ਕਰੇਗਾ। ਇਹ ਹੈ ਕਹਾਣੀ ਘੜਨ ਦੀ ਤਾਕਤ — ਜਿੱਤ ਮੈਦਾਨ ‘ਚ ਵੀ ਹੁੰਦੀ ਹੈ ਤੇ ਦਿਮਾਗਾਂ ‘ਚ ਵੀ।”ਆਪ੍ਰੇਸ਼ਨ ਦੇ ਨਾਮ ਬਾਰੇ ਦੱਸਦੇ ਹੋਏ ਉਨ੍ਹਾਂ ਕਿਹਾ, “‘ਸਿੰਦੂਰ’ ਨਾਮ ਨੇ ਪੂਰੇ ਦੇਸ਼ ਨੂੰ ਜੋੜ ਦਿੱਤਾ। ਲੋਕ ਪੁੱਛ ਰਹੇ ਸਨ, ‘ਹੁਣ ਕਿਉਂ ਰੁਕਣਾ?’ ਇਸਦਾ ਜਵਾਬ ਮੈਦਾਨ ਵਿੱਚ ਮਿਲ ਗਿਆ ਹੈ।”
ਭਾਰਤ ਨੇ ਇਸ ਕਾਰਵਾਈ ਨੂੰ ਸੰਯਮਿਤ ਅਤੇ ਬਿਨਾਂ ਤਣਾਅ ਵਧਾਏ ਹੋਇਆ ਦੱਸਿਆ, ਜਦਕਿ ਪਾਕਿਸਤਾਨ ਨੇ ਡਰੋਨ ਅਤੇ ਮਿਸਾਈਲ ਹਮਲਿਆਂ ਨਾਲ ਜਵਾਬ ਦੇਣ ਦੀ ਕੋਸ਼ਿਸ਼ ਕੀਤੀ, ਪਰ ਭਾਰਤੀ ਹਵਾਈ ਰੱਖਿਆ ਪ੍ਰਣਾਲੀ ਨੇ ਇਹਨਾਂ ਨੂੰ ਸਫਲਤਾਪੂਰਵਕ ਰੋਕ ਲਿਆ। ਸੈਨਿਕ ਵਿਸ਼ਲੇਸ਼ਕਾਂ ਨੇ ਇਸ ਆਪ੍ਰੇਸ਼ਨ ਨੂੰ ਰਣਨੀਤਿਕ ਸਫਲਤਾ ਕਰਾਰ ਦਿੱਤਾ ਹੈ, ਜਿਸ ਨਾਲ ਆਤੰਕੀ ਢਾਂਚਾ ਤਬਾਹ ਹੋਇਆ ਅਤੇ ਸਰਹੱਦ ਪਾਰ ਦੀ ਹਿੰਸਾ ਖ਼ਿਲਾਫ਼ ਭਾਰਤ ਦੀ ਰੋਕ-ਥਾਮ ਤਾਕਤ ਮਜ਼ਬੂਤ ਹੋਈ।
