ਡੇਰਾਬੱਸੀ, 17 ਅਪਰੈਲ (ਗੁਰਪ੍ਰੀਤ ਸਿੰਘ): ਪਿੰਡ ਸੁੰਢਰਾਂ ਦੀ ਮਾਣਯੋਗ ਧੀ ਜਸਵੀਰ ਕੌਰ ਢਿੱਲੋਂ, ਜੋ ਸ. ਭੂਪਿੰਦਰ ਸਿੰਘ ਢਿੱਲੋਂ ਦੀ ਸੁਪਤਨੀ ਅਤੇ ਚੇਅਰਮੈਨ ਸ. ਬਲਜੀਤ ਸਿੰਘ ਕਾਰਕੌਰ ਦੀ ਸਪੁੱਤਰੀ ਹੈ, ਨੇ ਹਿਮਾਚਲ ਪ੍ਰਦੇਸ਼ ਦੇ ਧਰਮਸ਼ਾਲਾ ਸ਼ਹਿਰ ਵਿੱਚ ਹੋਈਆਂ ਨੈਸ਼ਨਲ ਮਾਸਟਰ ਗੇਮਜ਼ 2025 ਵਿੱਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ 400 ਮੀਟਰ ਅਤੇ 800 ਮੀਟਰ ਦੌੜ ਵਿੱਚ ਦੋ ਸੋਨ ਤਮਗੇ ਹਾਸਿਲ ਕਰ ਲਏ ਹਨ।
ਖਾਸ ਗੱਲ ਇਹ ਰਹੀ ਕਿ ਜਸਵੀਰ ਕੌਰ ਨੇ 400 ਮੀਟਰ ਦੌੜ ਵਿੱਚ ਨਵਾਂ ਰਾਸ਼ਟਰੀ ਰਿਕਾਰਡ ਸਥਾਪਤ ਕਰਕੇ ਸੋਨ ਤਮਗਾ ਆਪਣੇ ਨਾਂ ਕੀਤਾ। ਇਹ ਉਹਨਾਂ ਦੇ ਖੇਡਾਂ ਪ੍ਰਤੀ ਸਮਰਪਣ ਅਤੇ ਮਿਹਨਤ ਦਾ ਨਤੀਜਾ ਹੈ।
ਇਸ ਤੋਂ ਪਹਿਲਾਂ ਵੀ ਜਸਵੀਰ ਢਿੱਲੋਂ ਨੇ ਚੰਡੀਗੜ੍ਹ ਮਾਸਟਰ ਗੇਮਜ਼, ਖੇਡਾਂ ਵਤਨ ਪੰਜਾਬ, ਅਤੇ ਜੈਤੋ (ਪੰਜਾਬ) ਵਿੱਚ ਹੋਈਆਂ ਮਾਸਟਰ ਗੇਮਜ਼ ਵਿੱਚ ਹਰ ਵਾਰੀ ਦੋ-ਦੋ ਸੋਨ ਤਮਗੇ ਜਿੱਤ ਕੇ ਆਪਣੇ ਇਲਾਕੇ ਅਤੇ ਪਰਿਵਾਰ ਦਾ ਮਾਣ ਵਧਾਇਆ ਹੈ।
ਹੁਣ ਜਸਵੀਰ ਕੌਰ ਆਪਣਾ ਧਿਆਨ ਮਲੇਸ਼ੀਆ ਅਤੇ ਅਮਰੀਕਾ ਵਿੱਚ ਹੋਣ ਵਾਲੀਆਂ ਅੰਤਰਰਾਸ਼ਟਰੀ ਮਾਸਟਰ ਗੇਮਜ਼ ਵੱਲ ਕੇਂਦਰਿਤ ਕਰ ਰਹੀ ਹਨ। ਉਹ ਇਸ ਮਕਸਦ ਨਾਲ ਕਠਿਨ ਮਿਹਨਤ ਕਰ ਰਹੀ ਹਨ ਕਿ ਪੰਜਾਬ, ਡੇਰਾਬੱਸੀ, ਸੁੰਢਰਾਂ ਪਿੰਡ ਅਤੇ ਆਪਣੇ ਪਰਿਵਾਰ ਦਾ ਨਾਂ ਰੌਸ਼ਨ ਕਰ ਸਕਣ।
ਜਸਵੀਰ ਕੌਰ ਬਚਪਨ ਤੋਂ ਹੀ ਖੇਡਾਂ ਵਿੱਚ ਰੁਚੀ ਰੱਖਦੀਆਂ ਹਨ ਅਤੇ ਉਨ੍ਹਾਂ ਦੀ ਇਹ ਸਫਲਤਾ ਹੋਰ ਨੌਜਵਾਨਾਂ ਲਈ ਪ੍ਰੇਰਣਾ ਦਾ ਸਰੋਤ ਹੈ।
