ਨੈਸ਼ਨਲ ਟਾਈਮਜ਼ ਬਿਊਰੋ :- ਭਾਰਤ ਦੀ ਸਭ ਤੋਂ ਆਧੁਨਿਕ ਅਤੇ ਤੀਵਰ ਰਫ਼ਤਾਰ ਵਾਲੀ ਮਿਸਾਈਲ ਬ੍ਰਹਮੋਸ-ਨੇਕਸਟ ਜਨਰੇਸ਼ਨ ਹੁਣ ਉੱਤਰ ਪ੍ਰਦੇਸ਼ ਦੇ ਲਖਨਊ ਸ਼ਹਿਰ ਵਿੱਚ ਤਿਆਰ ਹੋਏਗੀ। ਰੱਖਿਆ ਮੰਤਰੀ ਰਾਜਨਾਥ ਸਿੰਘ ਨੇ ਐਤਵਾਰ ਨੂੰ ਵਰਚੁਅਲ ਰੂਪ ਵਿੱਚ ਇਸ ਪ੍ਰੋਡਕਸ਼ਨ ਯੂਨਿਟ ਅਤੇ ਨਿਰੀਕਸ਼ਨ ਕੇਂਦਰ ਦਾ ਉਦਘਾਟਨ ਕੀਤਾ। ਇਸ ਮੌਕੇ ਉਨ੍ਹਾਂ ਨੇ ਕਿਹਾ ਕਿ ਕਿਸੇ ਵੀ ਹਾਲਤ ਵਿੱਚ ਦੇਸ਼ ਦੀ ਤਰੱਕੀ ਨਹੀਂ ਰੁਕੇਗੀ।
ਬ੍ਰਹਮੋਸ ਮਿਸਾਈਲ ਸਿਸਟਮ ਨੂੰ ਭਾਰਤ ਦੇ DRDO ਅਤੇ ਰੂਸ ਦੀ NPO ਮਸ਼ੀਨੋਸਟ੍ਰੋਏਨੀਆ ਨੇ ਮਿਲ ਕੇ ਤਿਆਰ ਕੀਤਾ ਹੈ। ਲਖਨਊ ਵਿੱਚ ਸਿਰਫ਼ 40 ਮਹੀਨਿਆਂ ਵਿੱਚ ਇਹ ਪ੍ਰੋਜੈਕਟ ਪੂਰਾ ਹੋਇਆ, ਜੋ ਦੇਸ਼ ਦੀ ਇਨਜਿਨੀਅਰਿੰਗ ਅਤੇ ਰੱਖਿਆ ਖੇਤਰ ਵਿੱਚ ਆਤਮਨਿਰਭਰਤਾ ਵੱਲ ਇੱਕ ਵੱਡੀ ਛਾਲ ਹੈ।
ਨਵੀਂ ਤਕਨੀਕ ਨਾਲ ਬਣੀ ਬ੍ਰਹਮੋਸ-ਨੇਕਸਟ ਜਨਰੇਸ਼ਨ (NG) ਮਿਸਾਈਲ, ਪੁਰਾਣੀ ਬ੍ਰਹਮੋਸ ਨਾਲੋਂ ਕਈ ਗੁਣਾ ਤੇਜ਼, ਲੰਬੀ ਰੇਂਜ ਵਾਲੀ ਅਤੇ ਵਧੀਆ ਮਾਰਕ ਸਮਰੱਥਾ ਵਾਲੀ ਹੋਵੇਗੀ। ਜਿੱਥੇ ਮੌਜੂਦਾ ਬ੍ਰਹਮੋਸ ਦੀ ਰੇਂਜ 290 ਤੋਂ 490 ਕਿਲੋਮੀਟਰ ਹੈ, ਓਥੇ ਨਵੀਂ ਮਿਸਾਈਲ 1500 ਕਿਲੋਮੀਟਰ ਤੱਕ ਨਿਸ਼ਾਨਾ ਸਾਧ ਸਕੇਗੀ। ਇਸ ਦੀ ਰਫ਼ਤਾਰ ਲਗਭਗ 4321 ਕਿਮੀ ਪ੍ਰਤੀ ਘੰਟਾ ਹੋਵੇਗੀ।
ਇਹ ਮਿਸਾਈਲ ਤਕਨੀਕੀ ਤੌਰ ਤੇ ਵੀ ਬੇਮਿਸਾਲ ਹੈ। ਇਹ 50 ਫੀਸਦੀ ਹਲਕੀ ਅਤੇ 3 ਮੀਟਰ ਛੋਟੀ ਹੋਣ ਕਰਕੇ ਦੁਸ਼ਮਣ ਦੇ ਰਡਾਰ ਦੀ ਪਕੜ ਤੋਂ ਬਚ ਸਕਦੀ ਹੈ। ਇਸ ਦਾ ਵਜ਼ਨ ਲਗਭਗ 1.5 ਟਨ ਅਤੇ ਲੰਬਾਈ 6 ਮੀਟਰ ਹੋਵੇਗੀ। ਇਹ ਸਮਰਥਾ ਰੱਖਦੀ ਹੈ ਕਿ ਉਹ ਸੀਮਾਵਾਰ ਵਾਪਰੀ ਕਿਸੇ ਵੀ ਅਣਚਾਹੀ ਗਤੀਵਿਧੀ ਜਾਂ ਅਕਸਮਾਤ ਹਮਲੇ ਵਿੱਚ ਤੁਰੰਤ ਅਤੇ ਨਿਸ਼ਚਿਤ ਕਾਰਵਾਈ ਕਰ ਸਕੇ।
ਰੱਖਿਆ ਮੰਤਰੀ ਨੇ ਕਿਹਾ, “ਬ੍ਰਹਮੋਸ ਸਿਰਫ਼ ਇੱਕ ਮਿਸਾਈਲ ਨਹੀਂ, ਇਹ ਭਾਰਤ ਦੀ ਰੱਖਿਆ ਸ਼ਕਤੀ, ਟੈਕਨੋਲੋਜੀਕਲ ਖੁਦਮੁਖਤਿਆਰੀ ਅਤੇ ਸਾਡੇ ਵਿਰੋਧੀਆਂ ਲਈ ਇੱਕ ਸਾਫ਼ ਸੰਦੇਸ਼ ਹੈ ਕਿ ਅਸੀਂ ਹਰ ਪੱਖੋਂ ਤਿਆਰ ਹਾਂ। ਇਹ ਮੇਰਾ ਸੁਪਨਾ ਸੀ, ਜੋ ਹੁਣ ਹਕੀਕਤ ਬਣ ਗਿਆ ਹੈ।”
ਇਸ ਨਵੇਂ ਕੇਂਦਰ ਦੇ ਸ਼ੁਰੂ ਹੋਣ ਨਾਲ ਭਵਿੱਖ ਵਿੱਚ ਭਾਰਤ ਦੀ ਰੱਖਿਆ ਯੋਜਨਾ ਹੋਰ ਵੀ ਮਜ਼ਬੂਤ ਹੋਏਗੀ ਅਤੇ ਦੇਸ਼ ਦੁਨੀਆ ਵਿੱਚ ਰੱਖਿਆ ਤਕਨੀਕ ਵਿੱਚ ਇੱਕ ਆਗੂ ਤਾਕਤ ਵਜੋਂ ਉਭਰੇਗਾ।
