ਨੈਸ਼ਨਲ ਟਾਈਮਜ਼ ਬਿਊਰੋ :- ਦੇਸ਼ ਦੇ ਕਿਸਾਨਾਂ ਸਿਰ ਖੇਤੀ ਕਰਜ਼ੇ ਦਾ ਬੋਝ ਵਧਦਾ ਜਾ ਰਿਹਾ ਹੈ। ਲੋਕ ਸਭਾ ਵਿੱਚ ਪੇਸ਼ ਕੀਤੇ ਗਏ ਅੰਕੜਿਆਂ ਮੁਤਾਬਕ ਕਿਸਾਨਾਂ ਉਤੇ ਕਰਜ਼ੇ ਦੀ ਪੰਡ ਕਾਫੀ ਭਾਰੀ ਹੋ ਗਈ ਹੈ। ਹਾਲ ਹੀ ਵਿੱਚ ਜਾਰੀ ਕੌਮੀ ਅੰਕੜਿਆਂ ਮੁਤਾਬਕ ਪ੍ਰਤੀ ਔਸਤ ਕਿਸਾਨ ਕਰਜ਼ੇ ਦੇ ਮਾਮਲੇ ਵਿੱਚ ਪੰਜਾਬ ਤੀਜੇ ਨੰਬਰ ’ਤੇ ਹੈ। ਇਸ ਤੋਂ ਇਲਾਵਾ ਹਰਿਆਣਾ, ਹਿਮਾਚਲ ਪ੍ਰਦੇਸ਼ ਅਤੇ ਉੱਤਰ ਪ੍ਰਦੇਸ਼ ਵੀ ਉਨ੍ਹਾਂ ਸੂਬਿਆਂ ਵਿੱਚ ਸ਼ਾਮਲ ਹਨ, ਜਿਨ੍ਹਾਂ ’ਤੇ ਔਸਤ ਕਿਸਾਨੀ ਕਰਜ਼ਾ ਸਭ ਤੋਂ ਵੱਧ ਹੈ।
ਹਾਲਾਂਕਿ, ਬਾਕੀ ਸੂਬਿਆਂ ਦੇ ਮੁਕਾਬਲੇ ਆਂਧਰਾ ਪ੍ਰਦੇਸ਼ ਇਸ ਮਾਮਲੇ ਵਿੱਚ ਮੁਲਕ ਵਿੱਚੋਂ ਪਹਿਲੇ ਨੰਬਰ ’ਤੇ ਹੈ, ਜਿੱਥੇ ਪ੍ਰਤੀ ਕਿਸਾਨ ਔਸਤ ਕਰਜ਼ਾ 2,45,554 ਰੁਪਏ ਹੈ। ਪੰਜਾਬ ਵਿੱਚ ਪ੍ਰਤੀ ਕਿਸਾਨ ਔਸਤ ਕਰਜ਼ਾ 2,03,249 ਰੁਪਏ ਹੈ। ਕਿਸਾਨੀ ਕਰਜ਼ਿਆਂ ਨੂੰ ਲੈ ਕੇ ਲੋਕ ਸਭਾ ਵਿੱਚ ਅੰਕੜਾ ਜਾਰੀ ਕੀਤਾ ਗਿਆ ਹੈ। ਦੇਸ਼ ਦੇ ਹਰ ਇੱਕ ਕਿਸਾਨ ਉਤੇ ਔਸਤ 74,121 ਰੁਪਏ ਦਾ ਕਰਜ਼ਾ ਹੈ।
ਕਰਜ਼ੇ ਦੇ ਮਾਮਲੇ ਵਿੱਚ ਪੰਜਾਬ ਪੂਰੇ ਦੇਸ਼ ਵਿੱਚੋਂ ਤੀਜੇ ਸਥਾਨ ਉਤੇ ਹੈ। ਸਭ ਤੋਂ ਵੱਧ ਆਂਧਰਾ ਪ੍ਰਦੇਸ਼ ਦੇ ਕਿਸਾਨਾਂ ਉੱਤੇ 2,45, 554 ਰੁਪਏ ਦਾ ਕਰਜ਼ ਹੈ। ਦੂਜੇ ਨੰਬਰ ਉੱਤੇ ਕੇਰਲਾ ਦੇ ਕਿਸਾਨਾਂ ਉੱਤੇ 2,42,482 ਰੁਪਏ ਦਾ ਕਰਜ਼ ਹੈ। ਇਸ ਤੋਂ ਇਲਾਵਾ ਤੀਜੇ ਨੰਬਰ ਉਤੇ ਪੰਜਾਬ ਦੇ ਕਿਸਾਨ ਉੱਤੇ 2, 03,249 ਰੁਪਏ ਦਾ ਕਰਜ਼ ਹੈ। ਚੌਥੇ ਨੰਬਰ ਉਤੇ ਹਰਿਆਣਾ ਦੇ ਕਿਸਾਨ ਉੱਤੇ 1,82,922 ਰੁਪਏ ਦਾ ਕਰਜ਼ ਹੈ।
ਪੰਜਵੇਂ ਨੰਬਰ ਤੇ ਤੇਲੰਗਾਨਾ ਦੇ ਕਿਸਾਨ ਉਤੇ 1,52, 113 ਰੁਪਏ ਦਾ ਕਰਜ਼ ਹੈ। ਸਭ ਤੋਂ ਘੱਟ ਨਾਗਾਲੈਂਡ ਦੇ ਕਿਸਾਨ ਉਤੇ 1750 ਦਾ ਕਰਜ਼ ਹੈ। ਨੌਰਥ ਈਸਟ ਦੀਆਂ ਸਟੇਟ ਦੇ ਕਿਸਾਨਾਂ ਉਤੇ ਔਸਤ 10,034 ਰੁਪਏ ਦਾ ਕਰਜ਼ ਹੈ। ਦੇਸ਼ ਦੇ ਕੇਂਦਰ ਸ਼ਾਸਿਤ ਪ੍ਰਦੇਸ਼ਾਂ ਉੱਤੇ 25,629 ਦਾ ਕਰਜ਼ ਹੈ।
