ਗੁਰਪ੍ਰੀਤ ਸਿੰਘ :- ਗਲਤ ਤੇ ਵਧੇ ਹੋਏ ਬਿਜਲੀ ਬਿੱਲਾਂ ਤੋਂ ਪਰੇਸ਼ਾਨ ਘਰੇਲੂ ਖਪਤਕਾਰਾਂ ਨੂੰ ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (ਪੀਐੱਸਪੀਸੀਐੱਲ) ਨੇ ਰਾਹਤ ਦਿੱਤੀ ਹੈ। ਨਿਗਮ ਨੇ ਅਜਿਹੇ ਘਰੇਲੂ ਸਪਲਾਈ (ਡੀਐੱਸ) ਕੁਨੈਕਸ਼ਨਾਂ ਨੂੰ ਡਿਫਾਲਟ ਦੇ ਆਧਾਰ ’ਤੇ ਕੱਟਣ ਦੀ ਕਾਰਵਾਈ ਤੁਰੰਤ ਰੋਕਣ ਦੇ ਹੁਕਮ ਦਿੱਤੇ ਹਨ, ਜਿਨ੍ਹਾਂ ਦੇ ਬਿੱਲਾਂ ਨੂੰ ਲੈ ਕੇ ਵਿਵਾਦ ਸਾਹਮਣੇ ਆ ਰਹੇ ਹਨ। ਇਹ ਰੋਕ ਗਲਤ ਬਿੱਲਾਂ ਦੀ ਸੋਧ ਹੋਣ ਤੱਕ ਜਾਰੀ ਰਹੇਗੀ।
ਪੀਐੱਸਪੀਸੀਐੱਲ ਦੇ ਡਾਇਰੈਕਟਰ ਡਿਸਟ੍ਰੀਬਿਊਸ਼ਨ ਵੱਲੋਂ 28 ਸਤੰਬਰ ਨੂੰ ਜਾਰੀ ਮੈਮੋ ਰਾਹੀਂ ਸਾਰੇ ਡੀਐੱਸ ਜ਼ੋਨਾਂ ਦੇ ਮੁੱਖ ਇੰਜੀਨੀਅਰਾਂ ਨੂੰ ਇਸ ਸਬੰਧੀ ਹਦਾਇਤਾਂ ਦਿੱਤੀਆਂ ਗਈਆਂ ਹਨ। ਨਿਗਮ ਨੇ ਮੰਨਿਆ ਹੈ ਕਿ ਹਾਲ ਹੀ ਵਿੱਚ ਮੀਟਰ ਰੀਡਰਾਂ ਦੀ ਹੜਤਾਲ ਅਤੇ ਐੱਸਏਪੀ/ਨਾਨ-ਐੱਸਏਪੀ ਸਿਸਟਮ ਤੋਂ ਓਰੇਕਲ ਆਧਾਰਿਤ ਐੱਸਬੀਐੱਸ ਸਿਸਟਮ ਵਿੱਚ ਮਾਈਗ੍ਰੇਸ਼ਨ ਕਾਰਨ ਵੱਡੀ ਗਿਣਤੀ ਘਰੇਲੂ ਖਪਤਕਾਰਾਂ ਦੇ ਬਿੱਲ ਔਸਤ ਜਾਂ ਅੰਦਾਜ਼ੇ ਦੀ ਖਪਤ ਦੇ ਆਧਾਰ ’ਤੇ ਜਾਰੀ ਹੋਏ।
ਇਸ ਕਾਰਨ ਕਈ ਖਪਤਕਾਰਾਂ ਨੂੰ ਅਸਲ ਖਪਤ ਨਾਲੋਂ ਵੱਧ ਰਕਮ ਦੇ ਬਿੱਲ ਮਿਲੇ। ਇਹ ਰਕਮ ਸਿਸਟਮ ਵਿੱਚ ਬਕਾਇਆ ਜਾਂ ਡਿਫਾਲਟ ਵਜੋਂ ਦਰਜ ਹੋਣ ਕਾਰਨ ਕੁਨੈਕਸ਼ਨ ਕੱਟਣ ਦੀ ਕਾਰਵਾਈ ਦਾ ਖ਼ਤਰਾ ਬਣ ਗਿਆ ਸੀ ਅਤੇ ਫੀਲਡ ਦਫ਼ਤਰਾਂ ਵਿੱਚ ਲਗਾਤਾਰ ਸ਼ਿਕਾਇਤਾਂ ਪਹੁੰਚ ਰਹੀਆਂ ਸਨ।
ਪੀਐੱਸਪੀਸੀਐੱਲ ਨੇ ਫੀਲਡ ਦਫ਼ਤਰਾਂ ਨੂੰ ਹੁਕਮਾਂ ਦੀ ਸਖ਼ਤੀ ਨਾਲ ਪਾਲਣਾ ਯਕੀਨੀ ਬਣਾਉਣ ਲਈ ਕਿਹਾ ਹੈ। ਨਿਗਮ ਨੇ ਸਪੱਸ਼ਟ ਕੀਤਾ ਹੈ ਕਿ ਗਲਤ ਜਾਂ ਵਧੇ ਹੋਏ ਬਿੱਲ ਕਾਰਨ ਸਿਸਟਮ ਵਿੱਚ ਬਕਾਇਆ ਦਿਖਾਈ ਦੇਣ ਮਾਤਰ ਨਾਲ ਖਪਤਕਾਰ ਦਾ ਕੁਨੈਕਸ਼ਨ ਨਹੀਂ ਕੱਟਿਆ ਜਾਵੇਗਾ। ਬਿੱਲ ਦੀ ਸੋਧ ਤੋਂ ਬਾਅਦ ਹੀ ਅਗਲੀ ਕਾਰਵਾਈ ਕੀਤੀ ਜਾਵੇਗੀ।
