ਮੁੰਬਈ- ਭਾਰਤੀ ਕ੍ਰਿਕਟ ਦੇ ਮਹਾਨ ਖਿਡਾਰੀ ਸਚਿਨ ਤੇਂਦੁਲਕਰ ਅਤੇ ਯੁਵਰਾਜ ਸਿੰਘ ਸ਼ਨੀਵਾਰ ਨੂੰ ਪਹਿਲੇ ਅੰਤਰਰਾਸ਼ਟਰੀ ਮਾਸਟਰਜ਼ ਲੀਗ ਦੇ ਉਦਘਾਟਨੀ ਮੈਚ ਵਿੱਚ ਸ਼੍ਰੀਲੰਕਾ ਵਿਰੁੱਧ ਇੱਕ ਵਾਰ ਫਿਰ ਭਾਰਤ ਦੀ ਪ੍ਰਤੀਕ ਨੀਲੀ ਜਰਸੀ ਪਹਿਨਣਗੇ। ਤੇਂਦੁਲਕਰ, ਇੱਕ ਮਹਾਨ ਖਿਡਾਰੀ ਜਿਸਨੇ ਅੰਤਰਰਾਸ਼ਟਰੀ ਪੱਧਰ ‘ਤੇ 34,000 ਤੋਂ ਵੱਧ ਦੌੜਾਂ ਅਤੇ 100 ਸੈਂਕੜੇ ਬਣਾਏ, ਨੇ ਖੇਡ ਦੇ ਹਰ ਫਾਰਮੈਟ ‘ਤੇ ਦਬਦਬਾ ਬਣਾਇਆ। ਹਾਲਾਂਕਿ, ਉਸਨੇ ਭਾਰਤ ਲਈ ਸਿਰਫ਼ ਇੱਕ ਟੀ-20 ਅੰਤਰਰਾਸ਼ਟਰੀ ਮੈਚ ਖੇਡਿਆ। ਇਸ ਨਾਲ ਪ੍ਰਸ਼ੰਸਕਾਂ ਲਈ ਉਸਨੂੰ ਖੇਡ ਦੇ ਸਭ ਤੋਂ ਛੋਟੇ ਫਾਰਮੈਟ ਵਿੱਚ ਇੱਕ ਵਾਰ ਫਿਰ ਭਾਰਤੀ ਜਰਸੀ ਵਿੱਚ ਦੇਖਣਾ ਦਿਲਚਸਪ ਹੋਵੇਗਾ।
ਭਾਰਤ ਅਤੇ ਸ਼੍ਰੀਲੰਕਾ ਵਿਚਾਲੇ ਹੋਏ ਮੁਕਾਬਲਿਆਂ ਨੇ ਸਾਲਾਂ ਤੋਂ ਪ੍ਰਸ਼ੰਸਕਾਂ ਨੂੰ ਮੰਤਰਮੁਗਧ ਕੀਤਾ ਹੈ। ਤੇਂਦੁਲਕਰ ਅਤੇ ਯੁਵਰਾਜ ਨੇ ਅਣਗਿਣਤ ਅਭੁੱਲ ਮੈਚ ਖੇਡੇ ਹਨ, ਜਿਨ੍ਹਾਂ ਵਿੱਚੋਂ 2011 ਦਾ ਵਨਡੇ ਵਿਸ਼ਵ ਕੱਪ ਫਾਈਨਲ ਵੀ ਸ਼ਾਮਲ ਹੈ ਜਿਸ ਵਿੱਚ ਭਾਰਤ ਚੈਂਪੀਅਨ ਬਣਿਆ ਸੀ। ਤੇਂਦੁਲਕਰ ਨੇ ਕਿਹਾ, “ਅਸੀਂ ਪਿਛਲੇ ਸਾਲਾਂ ਦੌਰਾਨ ਸ਼੍ਰੀਲੰਕਾ ਵਿਰੁੱਧ ਖੇਡਦੇ ਹੋਏ ਕੁਝ ਅਭੁੱਲ ਪਲ ਦੇਖੇ ਹਨ, 2011 ਦਾ ਵਿਸ਼ਵ ਕੱਪ ਉਨ੍ਹਾਂ ਸਾਰਿਆਂ ਵਿੱਚੋਂ ਸਭ ਤੋਂ ਖਾਸ ਸੀ।” ਉਨ੍ਹਾਂ ਕਿਹਾ, “ਇੰਨੇ ਸਾਲਾਂ ਬਾਅਦ ਮੈਦਾਨ ‘ਤੇ ਵਾਪਸ ਆਉਣਾ ਅਤੇ ਇੱਕ ਅਜਿਹੀ ਟੀਮ ਦਾ ਸਾਹਮਣਾ ਕਰਨਾ ਜੋ ਸਾਡੇ ਕ੍ਰਿਕਟ ਸਫ਼ਰ ਦਾ ਇੰਨਾ ਵੱਡਾ ਹਿੱਸਾ ਰਹੀ ਹੈ, ਇਸ ਨੂੰ ਹੋਰ ਵੀ ਖਾਸ ਬਣਾਉਂਦਾ ਹੈ।”
ਦੂਜੇ ਪਾਸੇ, ਯੁਵਰਾਜ ਨੇ ਭਾਰਤ ਦੀਆਂ ਕਈ ਮਹੱਤਵਪੂਰਨ ਜਿੱਤਾਂ ਵਿੱਚ ਮੁੱਖ ਭੂਮਿਕਾ ਨਿਭਾਈ ਹੈ, ਜਿਸ ਵਿੱਚ 2011 ਵਿਸ਼ਵ ਕੱਪ ਅਤੇ 2007 ਟੀ-20 ਵਿਸ਼ਵ ਕੱਪ ਸ਼ਾਮਲ ਹਨ।” ਯੁਵਰਾਜ ਨੇ ਕਿਹਾ, “ਮੈਂ ਦੁਬਾਰਾ ਮੈਦਾਨ ‘ਤੇ ਵਾਪਸੀ ਲਈ ਬੇਤਾਬ ਹਾਂ।” ਭਾਰਤ ਬਨਾਮ ਸ਼੍ਰੀਲੰਕਾ ਹਮੇਸ਼ਾ ਇੱਕ ਦਿਲਚਸਪ ਮੈਚ ਹੁੰਦਾ ਹੈ ਅਤੇ ਮੈਂ ਜਾਣਦਾ ਹਾਂ ਕਿ ਪ੍ਰਸ਼ੰਸਕ ਵੀ ਸਾਡੇ ਵਾਂਗ ਹੀ ਉਤਸ਼ਾਹਿਤ ਹਨ। ਉਸ ਨੇ ਕਿਹਾ, “ਦਿੱਗਜਾਂ ਨਾਲ ਖੇਡਣਾ ਤੇ ਪੁਰਾਣੀ ਮੁਕਾਬਲੇਬਾਜ਼ੀ ਨੂੰ ਦੁਬਾਰਾ ਸ਼ੁਰੂ ਕਰਨਾ ਹੀ ਇੰਟਰਨੈਸ਼ਨਲ ਮਾਸਟਰਜ਼ ਲੀਗ ਦਾ ਮਕਸਦ ਹੈ।” ਸਾਂਗਾ (ਸੰਗਕਾਰਾ) ਅਤੇ ਸਚਿਨ ਭਾਜੀ ਦੀ ਅਗਵਾਈ ਵਾਲੀ ਸ਼੍ਰੀਲੰਕਾ ਟੀਮ ਵਿਰੁੱਧ ਖੇਡਦਿਆਂ, ਅਜਿਹਾ ਮਹਿਸੂਸ ਹੁੰਦਾ ਹੈ ਕਿ ਅਸੀਂ ਸਮੇਂ ਵਿੱਚ ਵਾਪਸ ਚਲੇ ਗਏ ਹਾਂ, ਅਤੇ ਖੇਡ ਪ੍ਰਤੀ ਜਨੂੰਨ ਪਹਿਲਾਂ ਵਾਂਗ ਹੀ ਹੈ।’
ਇਸ ਟੂਰਨਾਮੈਂਟ ਵਿੱਚ ਛੇ ਟੀਮਾਂ ਹਿੱਸਾ ਲੈਣਗੀਆਂ ਜਿਸ ਵਿੱਚ ਭਾਰਤ, ਸ਼੍ਰੀਲੰਕਾ, ਆਸਟ੍ਰੇਲੀਆ, ਇੰਗਲੈਂਡ, ਵੈਸਟਇੰਡੀਜ਼ ਅਤੇ ਦੱਖਣੀ ਅਫਰੀਕਾ ਸ਼ਾਮਲ ਹਨ।” ਸਾਰੀਆਂ ਟੀਮਾਂ ਵਿੱਚ ਕ੍ਰਿਕਟ ਦੇ ਕੁਝ ਵੱਡੇ ਸਿਤਾਰੇ ਸ਼ਾਮਲ ਹਨ। ਇਹ ਮੁਕਾਬਲਾ ਨਵੀਂ ਮੁੰਬਈ, ਵਡੋਦਰਾ ਅਤੇ ਰਾਏਪੁਰ ਵਿੱਚ ਆਯੋਜਿਤ ਕੀਤਾ ਜਾਵੇਗਾ। ਸੈਮੀਫਾਈਨਲ ਅਤੇ 16 ਮਾਰਚ ਨੂੰ ਹੋਣ ਵਾਲਾ ਫਾਈਨਲ ਰਾਏਪੁਰ ਵਿੱਚ ਖੇਡੇ ਜਾਣਗੇ।
