ਨੈਸ਼ਨਲ ਟਾਈਮਜ਼ ਬਿਊਰੋ :- ਗੁਜਰਾਤ ਦੇ ਤੱਟ ਦੇ ਨੇੜੇ ਅੰਤਰਰਾਸ਼ਟਰੀ ਸਮੁੰਦਰੀ ਸੀਮਾ ਰੇਖਾ ’ਤੇ ਭਾਰਤੀ ਤੱਟ ਰੱਖਿਅਕ ਅਤੇ ਏਟੀਐਸ ਨੇ ਇਕ ਵੱਡੀ ਸਫਲਤਾ ਹਾਸਲ ਕਰਦਿਆਂ ਲਗਭਗ 1800 ਕਰੋੜ ਰੁਪਏ ਮੁੱਲ ਦੇ 300 ਕਿੱਲੋਗ੍ਰਾਮ ਨਸ਼ੀਲੇ ਪਦਾਰਥਾਂ ਦੀ ਖੇਪ ਜ਼ਬਤ ਕਰ ਲਈ। ਇਹ ਕਾਰਵਾਈ ਸਮੁੰਦਰ ਵਿੱਚ ਦੌਰਾਨ ਤਸਕਰਾਂ ਵਲੋਂ ਡਰੱਗਸ ਨੂੰ ਸਮੁੰਦਰ ਵਿੱਚ ਸੁੱਟ ਕੇ ਭੱਜਣ ਦੇ ਬਾਵਜੂਦ ਕੀਤੀ ਗਈ, ਜਦ ਕਿ ਭਾਰਤੀ ਟੀਮ ਨੇ ਤੁਰੰਤ ਗਿਰਫ਼ਤਾਰੀ ਕਾਰਵਾਈ ਨਹੀਂ ਹੋ ਸਕੀ, ਪਰ ਸਮੁੰਦਰ ਵਿੱਚੋਂ ਪਾਬੰਦੀਸ਼ੁਦਾ ਪਦਾਰਥ ਬਰਾਮਦ ਕਰ ਲਏ ਗਏ।
ਗੁਜਰਾਤ ਏਟੀਐਸ ਨੂੰ ਪਹਿਲਾਂ ਹੀ ਸੁਚਨਾ ਮਿਲੀ ਸੀ ਕਿ ਇੱਕ ਪਾਕਿਸਤਾਨੀ ਸਪਲਾਇਰ ਵਲੋਂ ਲਗਭਗ 400 ਕਿੱਲੋਗ੍ਰਾਮ ਡਰੱਗਸ ਦੀ ਖੇਪ ਪੋਰਬੰਦਰ ਨੇੜੇ ਭਾਰਤ ਦੀ ਅੰਤਰਰਾਸ਼ਟਰੀ ਸੀਮਾ ਰੇਖਾ ਦੇ ਰਾਹੀਂ ਭੇਜੀ ਜਾ ਰਹੀ ਹੈ। ਇਹ ਖੇਪ ਤਾਮਿਲਨਾਡੂ ਜਾਣ ਵਾਲੀ ਕਿਸ਼ਤੀ ਨੂੰ ਸੌਂਪੀ ਗਈ ਸੀ। ਜਾਂਚ ਲਈ ਏਟੀਐਸ ਨੇ ਇੰਸਪੈਕਟਰ ਅਤੇ ਸਬ-ਇੰਸਪੈਕਟਰ ਦੀ ਟੀਮ ਤੱਟ ਰੱਖਿਅਕਾਂ ਦੇ ਨਾਲ ਜੋੜੀ ਅਤੇ ਉਨ੍ਹਾਂ ਨੇ ਆਈਸੀਜੀ ਜਹਾਜ਼ ਰਾਹੀਂ ਸਮੁੰਦਰ ਵਿੱਚ ਸ਼ੱਕੀ ਗਤੀਵਿਧੀਆਂ ਦੀ ਨਿਗਰਾਨੀ ਕੀਤੀ।
12 ਅਤੇ 13 ਅਪ੍ਰੈਲ ਦੀ ਰਾਤ ਆਈਸੀਜੀ ਦੇ ਜਹਾਜ਼ ਨੇ ਰਡਾਰ ਰਾਹੀਂ ਪਾਕਿਸਤਾਨੀ ਮੱਛੀ ਫੜਨ ਵਾਲੀ ਇਕ ਛੋਟੀ ਕਿਸ਼ਤੀ ਨੂੰ ਪਤਾ ਲਾਇਆ, ਜੋ ਕਿ ਹੈਂਡਆਫ ਦੇ ਸਥਾਨ ਉੱਤੇ ਮੌਜੂਦ ਸੀ। ਜਦ ਪਾਕਿਸਤਾਨੀ ਤਸਕਰਾਂ ਨੇ ਆਈਸੀਜੀ ਜਹਾਜ਼ ਨੂੰ ਨੇੜੇ ਆਉਂਦੇ ਦੇਖਿਆ, ਤਾਂ ਉਨ੍ਹਾਂ ਨੇ ਨਸ਼ੀਲੇ ਪਦਾਰਥਾਂ ਨੂੰ ਤੁਰੰਤ ਸਮੁੰਦਰ ਵਿੱਚ ਸੁੱਟ ਦਿੱਤਾ ਤੇ ਆਪਣੀ ਕਿਸ਼ਤੀ ਰਾਹੀਂ ਹੱਦ ਪਾਰ ਕਰ ਗਏ। ਬਾਵਜੂਦ ਇਸ ਦੇ, ਤੱਟ ਰੱਖਿਅਕਾਂ ਨੇ ਤੁਰੰਤ ਕਾਰਵਾਈ ਕਰਦਿਆਂ ਡਰੱਗਜ਼ ਦੀ ਖੇਪ ਬਰਾਮਦ ਕਰ ਲਈ ਅਤੇ ਮਾਮਲੇ ਦੀ ਜਾਂਚ ਗੁਜਰਾਤ ਏਟੀਐਸ ਦੇ ਹਵਾਲੇ ਕਰ ਦਿੱਤੀ।ਇਸ ਕਾਰਵਾਈ ’ਤੇ ਕੇਂਦਰੀ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਨੇ ਵੀ ਪ੍ਰਤੀਕਿਰਿਆ ਦਿੰਦਿਆਂ ਕਿਹਾ ਕਿ ਇਹ ਸਫਲਤਾ ਨਸ਼ਾ ਮੁਕਤ ਭਾਰਤ ਵੱਲ ਮੋਦੀ ਸਰਕਾਰ ਦੇ ਸੰਕਲਪ ਦੀ ਤਾਕਤ ਦਾ ਸਾਬਤ ਸਬੂਤ ਹੈ। ਉਨ੍ਹਾਂ ਨੇ ਗੁਜਰਾਤ ਏਟੀਐਸ ਅਤੇ ਭਾਰਤੀ ਤੱਟ ਰੱਖਿਅਕਾਂ ਦੀ ਪੇਸ਼ੇਵਰਤਾ ਅਤੇ ਦ੍ਰਿੜਤਾ ਦੀ ਖੁੱਲ੍ਹ ਕੇ ਸ਼ਲਾਘਾ ਕੀਤੀ।
ਕੇਂਦਰ ਸਰਕਾਰ ਵਲੋਂ ਡਰੱਗ ਰੈਕੇਟਾਂ ਖਿਲਾਫ ਮੁਹਿੰਮ ਜਾਰੀ ਹੈ। ਪਿਛਲੇ ਹਫ਼ਤੇ ਅਸਾਮ ਵਿੱਚ ਵੀ 24 ਕਰੋੜ ਰੁਪਏ ਤੋਂ ਵੱਧ ਦੀ ਡਰੱਗਸ ਦੀ ਖੇਪ ਫੜੀ ਗਈ ਸੀ। ਸਰਕਾਰੀ ਅੰਕੜਿਆਂ ਮੁਤਾਬਕ 2024 ਵਿੱਚ ਸਾਰੇ ਦੇਸ਼ ’ਚੋਂ 16,914 ਕਰੋੜ ਰੁਪਏ ਦੀਆਂ ਨਸ਼ੀਲੀਆਂ ਖੇਪਾਂ ਜ਼ਬਤ ਕੀਤੀਆਂ ਗਈਆਂ ਹਨ, ਜੋ ਕਿ ਅੱਜ ਤੱਕ ਦੀ ਸਭ ਤੋਂ ਵੱਡੀ ਜ਼ਬਤੀ ਮੰਨੀ ਜਾ ਰਹੀ ਹੈ।ਇਹ ਸਫਲਤਾ ਨਾ ਸਿਰਫ਼ ਸਰਕਾਰੀ ਏਜੰਸੀਆਂ ਦੀ ਚੁਸਤ ਕਾਰਵਾਈ ਦਾ ਨਤੀਜਾ ਹੈ, ਸਗੋਂ ਇਹ ਭਾਰਤ ਨੂੰ ਨਸ਼ਾ ਮੁਕਤ ਦੇਸ਼ ਬਣਾਉਣ ਵੱਲ ਇਕ ਹੋਰ ਕਦਮ ਵੀ ਸਾਬਤ ਹੋ ਰਹੀ ਹੈ।
