ਬ੍ਰਿਟਿਸ਼ ਫੌਜ ਨਾਲ ਜੁੜੀ ਇੱਕ ਹੈਰਾਨ ਕਰਨ ਵਾਲੀ ਜਾਣਕਾਰੀ ਸਾਹਮਣੇ ਆਈ ਹੈ। ਇੱਥੇ ਭਰਤੀ ਦੌਰਾਨ 173 ਨਵੇਂ ਸੈਨਿਕਾਂ ਨੂੰ ਸਿਰਫ ਉਨ੍ਹਾਂ ਦੇ ਖਰਾਬ ਦੰਦਾਂ ਅਤੇ ਸੜਨ ਦੀ ਸਮੱਸਿਆ ਕਾਰਨ ਫੌਜ ਵਿੱਚੋਂ ਕੱਢ ਦਿੱਤਾ ਗਿਆ। ਫੌਜ ਦਾ ਕਹਿਣਾ ਹੈ ਕਿ ਜੋ ਉਮੀਦਵਾਰ ਆਪਣੇ ਦੰਦਾਂ ਅਤੇ ਸਿਹਤ ਦੀ ਸਹੀ ਢੰਗ ਨਾਲ ਦੇਖਭਾਲ ਨਹੀਂ ਕਰ ਸਕਦੇ, ਉਹ ਵੱਡੇ ਫੌਜੀ ਮੁਹਿੰਮਾਂ ਅਤੇ ਕਾਰਜਾਂ ਦੀ ਜ਼ਿੰਮੇਵਾਰੀ ਵੀ ਨਹੀਂ ਲੈ ਸਕਦੇ।
ਡਾਕਟਰੀ ਕਾਰਨਾਂ ਕਰ ਕੇ 47 ਹਜ਼ਾਰ ਸੈਨਿਕਾਂ ਦੀ ਰੋਕੀ ਭਰਤੀ
ਬ੍ਰਿਟਿਸ਼ ਰੱਖਿਆ ਮੰਤਰਾਲੇ ਦੇ ਅੰਕੜਿਆਂ ਅਨੁਸਾਰ, ਪਿਛਲੇ ਚਾਰ ਸਾਲਾਂ ਵਿੱਚ ਲਗਭਗ 47,000 ਸੈਨਿਕਾਂ ਨੂੰ ਡਾਕਟਰੀ ਆਧਾਰ ‘ਤੇ ਭਰਤੀ ਤੋਂ ਕੱਢ ਦਿੱਤਾ ਗਿਆ ਸੀ। ਇਨ੍ਹਾਂ ਵਿੱਚੋਂ 26,000 ਨੂੰ ਮਸੂੜਿਆਂ ਦੀ ਬਿਮਾਰੀ ਅਤੇ ਦੰਦਾਂ ਦੇ ਸੜਨ ਲਈ ਇਲਾਜ ਦੀ ਲੋੜ ਸੀ। ਇੱਕ ਅਧਿਐਨ ਤੋਂ ਪਤਾ ਲੱਗਾ ਹੈ ਕਿ ਹਰ 1,000 ਸੈਨਿਕਾਂ ਵਿੱਚੋਂ 150 ਨੂੰ ਕਿਸੇ ਸਮੇਂ ਦੰਦਾਂ ਦੇ ਇਲਾਜ ਦੀ ਲੋੜ ਹੁੰਦੀ ਹੈ। ਅਫਗਾਨਿਸਤਾਨ ਵਰਗੇ ਯੁੱਧ ਖੇਤਰਾਂ ਵਿੱਚ, ਸੈਨਿਕਾਂ ਨੂੰ ਦੰਦਾਂ ਦੇ ਇਲਾਜ ਲਈ ਕਈ ਵਾਰ ਹੈਲੀਕਾਪਟਰਾਂ ਰਾਹੀਂ ਵੱਡੇ ਠਿਕਾਣਿਆਂ ‘ਤੇ ਲਿਆਉਣਾ ਪੈਂਦਾ ਸੀ।
ਦੰਦਾਂ ਦੀ ਪਰੇਸ਼ਾਨੀ ਬਣੀ ਵੱਡੀ ਸਮੱਸਿਆ
ਬ੍ਰਿਟਿਸ਼ ਡੈਂਟਲ ਐਸੋਸੀਏਸ਼ਨ ਦਾ ਕਹਿਣਾ ਹੈ ਕਿ ਅਫਗਾਨਿਸਤਾਨ ਅਤੇ ਇਰਾਕ ਦੀ ਜੰਗ ਨਾਲੋਂ ਜ਼ਿਆਦਾ ਸੈਨਿਕ ਦੰਦਾਂ ਦੀਆਂ ਸਮੱਸਿਆਵਾਂ ਕਾਰਨ ਆਪਣੀਆਂ ਡਿਊਟੀਆਂ ਨਿਭਾਉਣ ਵਿੱਚ ਅਸਮਰੱਥ ਸਨ। ਰਿਪੋਰਟ ਦੇ ਅਨੁਸਾਰ, ਫੌਜ ਵਿੱਚ ਭਰਤੀ ਕੀਤੇ ਗਏ ਲੋਕਾਂ ਨੂੰ ਸਮਾਜ ਦੇ ਹੋਰ ਵਰਗਾਂ ਦੇ ਮੁਕਾਬਲੇ ਲਗਭਗ ਦੁੱਗਣੀਆਂ ਦੰਦਾਂ ਦੀਆਂ ਸਮੱਸਿਆਵਾਂ ਹਨ ਤੇ ਉਨ੍ਹਾਂ ‘ਚੋਂ ਜ਼ਿਆਦਾਤਰ ਗਰੀਬ ਪਰਿਵਾਰਾਂ ਤੋਂ ਆਉਂਦੇ ਹਨ।
ਮਾਨਸਿਕ ਤੇ ਹੋਰ ਬਿਮਾਰੀਆਂ ਵੀ ਇੱਕ ਵੱਡਾ ਕਾਰਨ
2020 ਤੋਂ 2024 ਤੱਕ ਦੇ ਅੰਕੜੇ ਦਰਸਾਉਂਦੇ ਹਨ ਕਿ ਲਗਭਗ ਅੱਧੇ ਸੈਨਿਕਾਂ ਨੂੰ ਮਾਨਸਿਕ ਸਮੱਸਿਆਵਾਂ ਕਾਰਨ ਭਰਤੀ ਤੋਂ ਰੋਕਿਆ ਗਿਆ ਸੀ। ਇਸ ਤੋਂ ਇਲਾਵਾ, ਦਿਲ ਦੀਆਂ ਬਿਮਾਰੀਆਂ, ਪ੍ਰਜਨਨ ਸਮੱਸਿਆਵਾਂ ਅਤੇ ਬੁਖਾਰ ਵਰਗੇ ਕਾਰਨਾਂ ਕਰਕੇ ਵੀ ਬਹੁਤ ਸਾਰੇ ਉਮੀਦਵਾਰਾਂ ਨੂੰ ਭਰਤੀ ਤੋਂ ਬਾਹਰ ਰੱਖਿਆ ਗਿਆ ਸੀ।
ਮੁਹਾਸਿਆਂ ਕਾਰਨ ਵੀ ਭਰਤੀ ਰੱਦ
ਸਿਰਫ ਦੰਦ ਹੀ ਨਹੀਂ, ਸਗੋਂ ਲਗਭਗ 1,800 ਨੌਜਵਾਨਾਂ ਨੂੰ ਮੁਹਾਸਿਆਂ ਤੇ ਚਮੜੀ ਦੀਆਂ ਸਮੱਸਿਆਵਾਂ ਕਾਰਨ ਫੌਜ ਵਿੱਚ ਭਰਤੀ ਨਹੀਂ ਕੀਤਾ ਗਿਆ ਸੀ।
ਫੌਜ ‘ਚ ਸੈਨਿਕਾਂ ਦੀ ਘਾਟ
ਵਰਤਮਾਨ ‘ਚ ਬ੍ਰਿਟਿਸ਼ ਫੌਜ ‘ਚ 71,000 ਸੈਨਿਕ ਹਨ, ਜਦੋਂ ਕਿ 2000 ਦੇ ਦਹਾਕੇ ਦੇ ਸ਼ੁਰੂ ਵਿੱਚ ਇਹ ਗਿਣਤੀ ਇੱਕ ਲੱਖ ਦੇ ਨੇੜੇ ਸੀ। ਰੱਖਿਆ ਸਕੱਤਰ ਜੌਨ ਹੀਲੀ ਨੇ ਮੰਨਿਆ ਕਿ ਇਸ ਪਾੜੇ ਨੂੰ ਭਰਨ ਵਿੱਚ ਸਮਾਂ ਲੱਗੇਗਾ।
ਭਰਤੀ ਦਾ ਟੀਚਾ ਵੀ ਅਧੂਰਾ
ਭਰਤੀ ਪ੍ਰਕਿਰਿਆ ਨੂੰ ਸੰਭਾਲਣ ਵਾਲੀ ਕੰਪਨੀ, ਕੈਪੀਟਾ ਦੇ ਇੱਕ ਅਧਿਕਾਰੀ ਰਿਚਰਡ ਹੋਲਰੋਇਡ ਦੇ ਅਨੁਸਾਰ, ਫੌਜ ਦੀ ਡਾਕਟਰੀ ਜਾਂਚ ਇੰਨੀ ਸਖ਼ਤ ਹੈ ਕਿ ਜੇਕਰ ਇੰਗਲੈਂਡ ਦੀ ਰਗਬੀ ਟੀਮ ਵੀ ਅਰਜ਼ੀ ਦਿੰਦੀ ਹੈ, ਤਾਂ ਉਨ੍ਹਾਂ ਨੂੰ ਵਾਪਸ ਭੇਜ ਦਿੱਤਾ ਜਾਵੇਗਾ। ਕੈਪੀਟਾ ਦਾ ਟੀਚਾ 2023/24 ਵਿੱਚ 9,813 ਨਵੇਂ ਸੈਨਿਕਾਂ ਦੀ ਭਰਤੀ ਕਰਨਾ ਸੀ, ਪਰ ਹੁਣ ਤੱਕ ਸਿਰਫ਼ 5,000 ਭਰਤੀਆਂ ਹੀ ਕੀਤੀਆਂ ਗਈਆਂ ਹਨ।
