ਦੱਖਣੀ ਬੈਂਗਲੁਰੂ ਦੇ ਸੁਦਾਗੁੰਟੇਪਾਲਿਆ ਵਿੱਚ ਇੱਕ 27 ਸਾਲਾ ਸਾਫਟਵੇਅਰ ਇੰਜੀਨੀਅਰ ਔਰਤ ਦੀ ਲਾਸ਼ ਉਸਦੇ ਘਰ ਵਿੱਚ ਫਾਹੇ ਨਾਲ ਲਟਕਦੀ ਮਿਲੀ। ਔਰਤ ਦੇ ਮਾਪਿਆਂ ਨੇ ਸ਼ਿਕਾਇਤ ਦਰਜ ਕਰਵਾਈ ਹੈ ਕਿ ਉਸਨੇ ਆਪਣੇ ਪਤੀ ਦੇ ਪਰਿਵਾਰ ਵੱਲੋਂ ਦਾਜ ਲਈ ਲਗਾਤਾਰ ਤੰਗ-ਪ੍ਰੇਸ਼ਾਨ ਕੀਤੇ ਜਾਣ ਤੋਂ ਬਾਅਦ ਖੁਦਕੁਸ਼ੀ ਕਰ ਲਈ। ਮ੍ਰਿਤਕ ਸ਼ਿਲਪਾ ਦਾ ਵਿਆਹ ਢਾਈ ਸਾਲ ਪਹਿਲਾਂ ਪ੍ਰਵੀਨ ਨਾਲ ਹੋਇਆ ਸੀ, ਜੋ ਕਿ ਇੱਕ ਸਾਬਕਾ ਸਾਫਟਵੇਅਰ ਇੰਜੀਨੀਅਰ ਸੀ। ਇਸ ਜੋੜੇ ਦਾ ਡੇਢ ਸਾਲ ਦਾ ਬੱਚਾ ਹੈ।
ਪੁਲਸ ਦੇ ਅਨੁਸਾਰ ਪਰਿਵਾਰ ਨੇ ਦਾਅਵਾ ਕੀਤਾ ਕਿ ਉਨ੍ਹਾਂ ਨੇ ਵਿਆਹ ‘ਤੇ ਲਗਭਗ 35 ਲੱਖ ਰੁਪਏ ਖਰਚ ਕੀਤੇ ਅਤੇ ਲਾੜੇ ਨੂੰ 150 ਗ੍ਰਾਮ ਸੋਨਾ ਦਿੱਤਾ। ਵਿਆਹ ਤੋਂ ਬਾਅਦ ਜੋੜਾ ਬੀਟੀਐਮ ਲੇਆਉਟ ਵਿੱਚ ਰਹਿੰਦਾ ਸੀ। ਪ੍ਰਵੀਨ, ਜੋ ਪਹਿਲਾਂ ਵ੍ਹਾਈਟਫੀਲਡ ਵਿੱਚ ਓਰੇਕਲ ਵਿੱਚ ਨੌਕਰੀ ਕਰਦਾ ਸੀ, ਜਿਸਨੇ ਆਪਣੀ ਨੌਕਰੀ ਛੱਡ ਦਿੱਤੀ ਸੀ ਤੇ ਪਾਣੀਪੁਰੀ ਦਾ ਕਾਰੋਬਾਰ ਸ਼ੁਰੂ ਕਰ ਦਿੱਤਾ ਸੀ।
ਸ਼ਿਕਾਇਤ ਵਿੱਚ ਕਿਹਾ ਗਿਆ ਹੈ ਕਿ ਔਰਤ ਦੀ ਸੱਸ ਅਕਸਰ ਉਸਨੂੰ ਤੰਗ ਕਰਦੀ ਸੀ, ਕਹਿੰਦੀ ਸੀ, “ਤੂੰ ਕਾਲੀ ਏਂ ਅਤੇ ਮੇਰੇ ਪੁੱਤਰ ਲਈ ਚੰਗੀ ਨਹੀਂ ਹੈਂ, ਉਸਨੂੰ ਛੱਡ ਦੇ ਅਸੀਂ ਉਸਦੇ ਲਈ ਇੱਕ ਬਿਹਤਰ ਦੁਲਹਨ ਲੱਭ ਲਵਾਂਗੇ।” ਸ਼ਿਕਾਇਤ ਵਿੱਚ ਦੋਸ਼ ਲਗਾਇਆ ਗਿਆ ਹੈ ਕਿ ਪ੍ਰਵੀਨ ਤੇ ਉਸਦੀ ਮਾਂ ਸ਼ਾਂਤਵਵਾ, ਸ਼ਿਲਪਾ ਨੂੰ ਪੈਸਿਆਂ ਲਈ ਮਾਨਸਿਕ ਅਤੇ ਸਰੀਰਕ ਤੌਰ ‘ਤੇ ਪਰੇਸ਼ਾਨ ਕਰਦੇ ਸਨ, ਉਸਦੇ ਕਾਰੋਬਾਰ ਲਈ 5 ਲੱਖ ਰੁਪਏ ਦੀ ਮੰਗ ਕਰਦੇ ਸਨ। ਜਦੋਂ ਮੰਗ ਪੂਰੀ ਨਹੀਂ ਹੋਈ, ਤਾਂ ਉਸ ‘ਤੇ ਕਥਿਤ ਤੌਰ ‘ਤੇ ਹਮਲਾ ਕੀਤਾ ਗਿਆ ਅਤੇ ਉਸਦੇ ਮਾਪਿਆਂ ਕੋਲ ਵਾਪਸ ਭੇਜ ਦਿੱਤਾ ਗਿਆ।
ਮ੍ਰਿਤਕਾ ਦੀ ਮਾਂ ਸ਼ਾਰਦਾ ਨੇ ਕਿਹਾ ਕਿ ਉਸਨੇ ਆਖਰਕਾਰ ਪੈਸੇ ਇਕੱਠੇ ਕੀਤੇ ਤੇ ਆਪਣੀ ਧੀ ਨੂੰ ਵਾਪਸ ਭੇਜ ਦਿੱਤਾ ਪਰ ਪਰੇਸ਼ਾਨੀ ਜਾਰੀ ਰਹੀ। 26 ਅਗਸਤ ਨੂੰ ਪਰਿਵਾਰ ਨੂੰ ਸੂਚਿਤ ਕੀਤਾ ਗਿਆ ਕਿ ਸ਼ਿਲਪਾ ਦੀ ਮੌਤ ਖੁਦਕੁਸ਼ੀ ਨਾਲ ਹੋਈ ਹੈ। ਜਦੋਂ ਉਹ ਉਸਦੇ ਘਰ ਪਹੁੰਚੇ, ਤਾਂ ਉਨ੍ਹਾਂ ਨੇ ਉਸਨੂੰ ਬਿਸਤਰੇ ‘ਤੇ ਚਾਦਰ ਨਾਲ ਢੱਕੀ ਹੋਈ ਬੇਜਾਨ ਪਾਈ। ਸ਼ਿਕਾਇਤ ਦੇ ਆਧਾਰ ‘ਤੇ ਪੁਲਸ ਨੇ ਵੀਰਵਾਰ ਨੂੰ ਪ੍ਰਵੀਨ ਨੂੰ ਗ੍ਰਿਫਤਾਰ ਕਰ ਲਿਆ। ਹੋਰ ਜਾਂਚ ਜਾਰੀ ਹੈ।
