ਗੁਰਪ੍ਰੀਤ ਸਿੰਘ :- ਆਦਿਤਿਆ ਧਰ ਦੇ ਨਿਰਦੇਸ਼ਨ ਹੇਠ ਬਣੀ ‘ਧੁਰੰਦਰ’ ਫਰੈਂਚਾਇਜ਼ੀ ਨੇ ਬਾਕਸ ਆਫਿਸ ‘ਤੇ ਅਜਿਹਾ ਧਮਾਕਾ ਕੀਤਾ ਹੈ ਕਿ ਹਰ ਪਾਸੇ ਇਸ ਦੀ ਹੀ ਚਰਚਾ ਹੋ ਰਹੀ ਹੈ। ‘ਧੁਰੰਦਰ’ ਫਰੈਂਚਾਇਜ਼ੀ ਦੀਆਂ ਦੋਹਾਂ ਫਿਲਮਾਂ ਨੇ ਮਿਲ ਕੇ ਦੁਨੀਆ ਭਰ ਵਿੱਚ 3000 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਕਰਕੇ ਇੱਕ ਨਵਾਂ ਕੀਰਤੀਮਾਨ ਸਥਾਪਿਤ ਕੀਤਾ ਹੈ। ਇਹ ਇੰਨੀ ਵੱਡੀ ਸਫਲਤਾ ਹਾਸਲ ਕਰਨ ਵਾਲੀ ਪਹਿਲੀ ਭਾਰਤੀ ਫਿਲਮ ਸੀਰੀਜ਼ ਬਣ ਗਈ ਹੈ।
ਪਹਿਲੇ ਹਿੱਸੇ ਨੇ ਰੱਖੀ ਸੀ ਮਜ਼ਬੂਤ ਨੀਂਹ
ਫਰੈਂਚਾਇਜ਼ੀ ਦਾ ਸਫ਼ਰ 5 ਦਸੰਬਰ, 2025 ਨੂੰ ‘ਧੁਰੰਦਰ’ ਦੀ ਰਿਲੀਜ਼ ਨਾਲ ਸ਼ੁਰੂ ਹੋਇਆ ਸੀ। ਸ਼ੁਰੂਆਤੀ ਸ਼ੰਕਿਆਂ ਦੇ ਬਾਵਜੂਦ, ਦਰਸ਼ਕਾਂ ਨੇ ਇਸ ਜਾਸੂਸੀ ਐਕਸ਼ਨ ਥ੍ਰਿਲਰ ਫਿਲਮ ਨੂੰ ਭਰਵਾਂ ਹੁੰਗਾਰਾ ਦਿੱਤਾ। ਇਸ ਫਿਲਮ ਨੇ ਹਿੰਦੀ ਬਾਕਸ ਆਫਿਸ ‘ਤੇ 840 ਕਰੋੜ ਰੁਪਏ (ਨੈੱਟ) ਅਤੇ ਦੁਨੀਆ ਭਰ ਵਿੱਚ 1300 ਕਰੋੜ ਰੁਪਏ ਤੋਂ ਵੱਧ ਦੀ ਕਮਾਈ ਕੀਤੀ।
‘ਧੁਰੰਧਰ 2’ ਨੇ ਤੋੜੇ ਸਾਰੇ ਰਿਕਾਰਡ
ਪਹਿਲੇ ਹਿੱਸੇ ਤੋਂ ਸਿਰਫ਼ 4 ਮਹੀਨਿਆਂ ਬਾਅਦ ਰਿਲੀਜ਼ ਹੋਈ ‘ਧੁਰੰਦਰ 2’ ਨੇ ਕਮਾਈ ਦੇ ਨਵੇਂ ਸਿਖਰਾਂ ਨੂੰ ਛੂਹ ਲਿਆ ਹੈ। ਰਣਵੀਰ ਸਿੰਘ ਦੀ ਅਗਵਾਈ ਵਾਲੀ ਇਸ ਫਿਲਮ ਨੇ ਵਿਸ਼ਵ ਪੱਧਰ ‘ਤੇ 1700 ਕਰੋੜ ਰੁਪਏ ਤੋਂ ਵੱਧ ਦਾ ਕਾਰੋਬਾਰ ਕੀਤਾ ਹੈ। ਖਾਸ ਗੱਲ ਇਹ ਹੈ ਕਿ ਇਹ ਭਾਰਤੀ ਬਾਕਸ ਆਫਿਸ ‘ਤੇ ਇੱਕ ਹੀ ਭਾਸ਼ਾ (ਹਿੰਦੀ) ਵਿੱਚ 1000 ਕਰੋੜ ਰੁਪਏ (ਨੈੱਟ) ਦੀ ਕਮਾਈ ਕਰਨ ਵਾਲੀ ਪਹਿਲੀ ਫਿਲਮ ਵੀ ਬਣ ਗਈ ਹੈ।
ਸਟਾਰ ਕਾਸਟ ਅਤੇ ਨਿਰਦੇਸ਼ਨ
ਇਸ ਫਰੈਂਚਾਇਜ਼ੀ ਦਾ ਨਿਰਦੇਸ਼ਨ ਆਦਿਤਿਆ ਧਰ ਨੇ ਕੀਤਾ ਹੈ ਅਤੇ ਇਸ ਵਿੱਚ ਦੇਸ਼ ਭਗਤੀ ਤੇ ਜ਼ਬਰਦਸਤ ਐਕਸ਼ਨ ਦਾ ਸੁਮੇਲ ਦੇਖਣ ਨੂੰ ਮਿਲਿਆ ਹੈ। ‘ਧੁਰੰਦਰ 2’ ਵਿੱਚ ਰਣਵੀਰ ਸਿੰਘ ਦੇ ਨਾਲ ਸਾਰਾ ਅਰਜੁਨ, ਗੌਰਵ ਗੇਰਾ, ਸੰਜੇ ਦੱਤ, ਆਰ. ਮਾਧਵਨ, ਰਾਕੇਸ਼ ਬੇਦੀ ਅਤੇ ਅਰਜੁਨ ਰਾਮਪਾਲ ਵਰਗੇ ਦਿੱਗਜ ਕਲਾਕਾਰ ਹਨ। ਪਹਿਲੇ ਹਿੱਸੇ ਵਿੱਚ ਅਕਸ਼ੈ ਖੰਨਾ ਨੇ ਵੀ ਅਹਿਮ ਭੂਮਿਕਾ ਨਿਭਾਈ ਸੀ।
ਵਿਸ਼ਵ ਪੱਧਰ ‘ਤੇ ਵਧਿਆ ਮਾਣ
3000 ਕਰੋੜ ਦਾ ਇਹ ਅੰਕੜਾ ਸਿਰਫ਼ ਇੱਕ ਨੰਬਰ ਨਹੀਂ ਹੈ, ਸਗੋਂ ਇਹ ਦਰਸਾਉਂਦਾ ਹੈ ਕਿ ਭਾਰਤੀ ਫਿਲਮ ਫਰੈਂਚਾਇਜ਼ੀ ਹੁਣ ਦੁਨੀਆ ਦੀਆਂ ਵੱਡੀਆਂ ਫਿਲਮ ਸੀਰੀਜ਼ਾਂ ਦਾ ਮੁਕਾਬਲਾ ਕਰ ਸਕਦੀ ਹੈ। ਇਸ ਤੋਂ ਪਹਿਲਾਂ ਦੁਨੀਆ ਭਰ ਵਿੱਚ ਕੋਈ ਵੀ ਭਾਰਤੀ ਫ਼ਿਲਮ ਸੀਰੀਜ਼ 3000 ਕਰੋੜ ਨੂੰ ਪਾਰ ਨਹੀਂ ਕਰ ਸਕੀ ਸੀ। ਜੀਓ ਸਟੂਡੀਓਜ਼ ਅਤੇ B62 ਸਟੂਡੀਓਜ਼ ਦੇ ਬੈਨਰ ਹੇਠ ਬਣੀ ਇਸ ਫਰੈਂਚਾਇਜ਼ੀ ਨੇ ਬਾਲੀਵੁੱਡ ਲਈ ਸਫਲਤਾ ਦੇ ਨਵੇਂ ਮਾਪਦੰਡ ਤੈਅ ਕੀਤੇ ਹਨ।
