ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਆਖ਼ਰੀ ਪੜਾਅ ‘ਚ ਦਾਖ਼ਲ, ਭਾਰਤ ਤੇ ਮਲੇਸ਼ੀਆ ਸੈਮੀਫਾਈਨਲ ‘ਚ ਪਹੁੰਚੇ

ਮੋਹਾਲੀ (ਗੁਰਪ੍ਰੀਤ ਸਿੰਘ) : ਪੰਜਾਬ ਦੀ ਧਰਤੀ ‘ਤੇ ਪਹਿਲੀ ਵਾਰ ਕਰਵਾਈ ਜਾ ਰਹੀ ਅੰਤਰਰਾਸ਼ਟਰੀ ਹਾਕੀ ਟੂਰਨਾਮੈਂਟ ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਹੁਣ ਆਖ਼ਰੀ ਪੜਾਅ ਵਿੱਚ ਦਾਖ਼ਲ ਹੋ ਗਈ ਹੈ। ਟੂਰਨਾਮੈਂਟ ਵਿੱਚ ਹਿੱਸਾ ਲੈ ਰਹੀ ਹਰ ਟੀਮ ਆਪਣੇ ਤਿੰਨ ਲੀਗ ਮੈਚ ਖੇਡ ਚੁੱਕੀ ਹੈ ਅਤੇ ਹੁਣ ਹਰੇਕ ਟੀਮ ਦੇ ਦੋ ਮੈਚ ਬਾਕੀ ਹਨ। ਲੀਗ ਪੜਾਅ ਦੇ ਬਾਕੀ ਮੁਕਾਬਲੇ 1 ਅਤੇ 2 ਨਵੰਬਰ ਨੂੰ ਖੇਡੇ ਜਾਣਗੇ। ਭਾਰਤ ਅਤੇ ਮਲੇਸ਼ੀਆ ਨੇ ਆਪਣੇ ਤਿੰਨੇ ਮੈਚ ਜਿੱਤ ਕੇ ਸੈਮੀਫਾਈਨਲ ਵਿੱਚ ਜਗ੍ਹਾ ਪੱਕੀ ਕਰ ਲਈ ਹੈ।

ਟੂਰਨਾਮੈਂਟ ਵਿੱਚ ਸਭ ਤੋਂ ਵੱਧ ਗੋਲ ਕਰਨ ਵਾਲੇ ਖਿਡਾਰੀਆਂ ਦੀ ਸੂਚੀ ਵਿੱਚ ਭਾਰਤੀ ਕਪਤਾਨ ਹਰਮਨਪ੍ਰੀਤ ਸਿੰਘ ਪੰਜ ਗੋਲਾਂ ਨਾਲ ਪਹਿਲੇ ਸਥਾਨ ‘ਤੇ ਹੈ। ਇਸ ਟੂਰਨਾਮੈਂਟ ਨੂੰ ਪੰਜਾਬ ਵਿੱਚ ਕਰਵਾਉਣ ਦਾ ਸਿਹਰਾ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੇ ਯਤਨਾਂ ਅਤੇ ਦ੍ਰਿਸ਼ਟੀਕੋਣ ਨੂੰ ਦਿੱਤਾ ਜਾ ਰਿਹਾ ਹੈ। ਭਾਰਤੀ ਹਾਕੀ ਖਿਡਾਰੀਆਂ ਲਈ ਵੀ ਇਹ ਖ਼ਾਸ ਮੌਕਾ ਹੈ, ਕਿਉਂਕਿ ਉਹ ਲੰਬੇ ਸਮੇਂ ਤੋਂ ਆਪਣੀ ਧਰਤੀ ‘ਤੇ ਅੰਤਰਰਾਸ਼ਟਰੀ ਮੁਕਾਬਲਾ ਖੇਡਣ ਦੀ ਇੱਛਾ ਰੱਖਦੇ ਸਨ।

1 ਅਤੇ 2 ਨਵੰਬਰ ਨੂੰ ਹੋਣਗੇ ਲੀਗ ਪੜਾਅ ਦੇ ਆਖ਼ਰੀ ਮੁਕਾਬਲੇ

ਸ਼ਨੀਵਾਰ ਨੂੰ ਏਸ਼ੀਅਨ ਚੈਂਪੀਅਨਜ਼ ਟਰਾਫੀ ਵਿੱਚ ਸਾਰੀਆਂ ਟੀਮਾਂ ਲਈ ਆਰਾਮ ਦਾ ਦਿਨ ਰੱਖਿਆ ਗਿਆ ਸੀ ਅਤੇ ਕੋਈ ਮੈਚ ਨਹੀਂ ਖੇਡਿਆ ਗਿਆ। ਹਾਲਾਂਕਿ ਚੀਨ, ਦੱਖਣੀ ਕੋਰੀਆ ਅਤੇ ਬੰਗਲਾਦੇਸ਼ ਦੀਆਂ ਟੀਮਾਂ ਨੇ ਅਭਿਆਸ ਸੈਸ਼ਨਾਂ ਵਿੱਚ ਹਿੱਸਾ ਲਿਆ।

ਲੀਗ ਪੜਾਅ ਦੇ ਆਖ਼ਰੀ ਦਿਨਾਂ ਵਿੱਚ ਮੈਚ ਦੁਪਹਿਰ 2:30 ਵਜੇ, ਸ਼ਾਮ 4:45 ਵਜੇ ਅਤੇ ਸ਼ਾਮ 7 ਵਜੇ ਖੇਡੇ ਜਾਣਗੇ।

1 ਨਵੰਬਰ ਦੇ ਮੁਕਾਬਲੇ:

ਦੱਖਣੀ ਕੋਰੀਆ ਬਨਾਮ ਬੰਗਲਾਦੇਸ਼

ਚੀਨ ਬਨਾਮ ਜਾਪਾਨ

ਭਾਰਤ ਬਨਾਮ ਮਲੇਸ਼ੀਆ

2 ਨਵੰਬਰ ਦੇ ਮੁਕਾਬਲੇ:

ਚੀਨ ਬਨਾਮ ਬੰਗਲਾਦੇਸ਼

ਮਲੇਸ਼ੀਆ ਬਨਾਮ ਜਾਪਾਨ

ਭਾਰਤ ਬਨਾਮ ਦੱਖਣੀ ਕੋਰੀਆ

ਸਾਰੇ ਮੁਕਾਬਲੇ ਨਿਰਧਾਰਤ ਸਮੇਂ ਅਨੁਸਾਰ ਦੁਪਹਿਰ 2:30 ਵਜੇ, ਸ਼ਾਮ 4:45 ਵਜੇ ਅਤੇ ਸ਼ਾਮ 7 ਵਜੇ ਖੇਡੇ ਜਾਣਗੇ।

ਅੰਕ ਸੂਚੀ ਵਿੱਚ ਭਾਰਤ ਪਹਿਲੇ ਅਤੇ ਮਲੇਸ਼ੀਆ ਦੂਜੇ ਸਥਾਨ ‘ਤੇ

ਇੱਥੇ ਓਲੰਪੀਅਨ ਸੁਰਜੀਤ ਹਾਕੀ ਸਟੇਡੀਅਮ ਵਿੱਚ ਖੇਡੇ ਗਏ ਲੀਗ ਮੈਚਾਂ ਤੋਂ ਬਾਅਦ ਭਾਰਤ ਅਤੇ ਮਲੇਸ਼ੀਆ ਨੇ ਤਿੰਨ-ਤਿੰਨ ਜਿੱਤਾਂ ਨਾਲ ਸੈਮੀਫਾਈਨਲ ਵਿੱਚ ਜਗ੍ਹਾ ਬਣਾ ਲਈ ਹੈ। ਬਿਹਤਰ ਗੋਲ ਅੰਤਰ ਕਾਰਨ ਭਾਰਤ ਅੰਕ ਸੂਚੀ ਵਿੱਚ ਪਹਿਲੇ ਸਥਾਨ ‘ਤੇ ਹੈ, ਜਦਕਿ ਮਲੇਸ਼ੀਆ ਦੂਜੇ ਸਥਾਨ ‘ਤੇ ਹੈ।

ਜਾਪਾਨ ਦੋ ਜਿੱਤਾਂ ਨਾਲ ਤੀਜੇ ਸਥਾਨ ‘ਤੇ ਹੈ, ਜਦਕਿ ਦੱਖਣੀ ਕੋਰੀਆ ਇੱਕ ਜਿੱਤ ਨਾਲ ਚੌਥੇ ਸਥਾਨ ‘ਤੇ ਕਾਬਜ਼ ਹੈ। ਚੀਨ ਅਤੇ ਬੰਗਲਾਦੇਸ਼ ਨੂੰ ਹੁਣ ਤੱਕ ਕੋਈ ਜਿੱਤ ਨਹੀਂ ਮਿਲੀ। ਟੂਰਨਾਮੈਂਟ ਵਿੱਚ ਹਿੱਸਾ ਲੈ ਰਹੀਆਂ ਛੇ ਟੀਮਾਂ ਵਿੱਚੋਂ ਪਹਿਲੀਆਂ ਚਾਰ ਟੀਮਾਂ ਸੈਮੀਫਾਈਨਲ ਵਿੱਚ ਪਹੁੰਚਣਗੀਆਂ, ਜਦਕਿ ਪੰਜਵੇਂ ਅਤੇ ਛੇਵੇਂ ਸਥਾਨ ‘ਤੇ ਰਹਿਣ ਵਾਲੀਆਂ ਟੀਮਾਂ ਪੰਜਵੇਂ ਸਥਾਨ ਲਈ ਮੁਕਾਬਲਾ ਕਰਨਗੀਆਂ।

ਨਾਕਆਊਟ ਪੜਾਅ ਦੇ ਸਾਰੇ ਮੈਚ 4 ਅਤੇ 5 ਨਵੰਬਰ ਨੂੰ ਮੋਹਾਲੀ ਦੇ ਓਲੰਪੀਅਨ ਬਲਬੀਰ ਸਿੰਘ ਸੀਨੀਅਰ ਸਟੇਡੀਅਮ ਵਿੱਚ ਖੇਡੇ ਜਾਣਗੇ।

ਹੁਣ ਤੱਕ 9 ਮੈਚਾਂ ਵਿੱਚ ਹੋਏ 54 ਗੋਲ

ਟੂਰਨਾਮੈਂਟ ਵਿੱਚ ਹੁਣ ਤੱਕ ਕੁੱਲ 9 ਮੈਚ ਖੇਡੇ ਜਾ ਚੁੱਕੇ ਹਨ। ਇਨ੍ਹਾਂ ਸਾਰੇ ਮੈਚਾਂ ਵਿੱਚ ਜਿੱਤ-ਹਾਰ ਦਾ ਫੈਸਲਾ ਹੋਇਆ ਅਤੇ ਕੋਈ ਵੀ ਮੁਕਾਬਲਾ ਡਰਾਅ ਨਹੀਂ ਰਿਹਾ। ਇਨ੍ਹਾਂ ਮੈਚਾਂ ਵਿੱਚ ਕੁੱਲ 54 ਗੋਲ ਹੋਏ ਹਨ, ਜਿਸ ਦਾ ਔਸਤ ਹਰ ਮੈਚ ਵਿੱਚ 6 ਗੋਲ ਹੈ।

ਕੁੱਲ 54 ਗੋਲਾਂ ਵਿੱਚੋਂ 28 ਫੀਲਡ ਗੋਲ, 23 ਪੈਨਲਟੀ ਕਾਰਨਰ ਅਤੇ 3 ਪੈਨਲਟੀ ਸਟ੍ਰੋਕ ਰਾਹੀਂ ਕੀਤੇ ਗਏ ਹਨ।

ਤਿੰਨ ਮੈਚਾਂ ਤੋਂ ਬਾਅਦ ਭਾਰਤ ਨੇ ਸਭ ਤੋਂ ਵੱਧ 22 ਗੋਲ ਕੀਤੇ ਹਨ ਅਤੇ ਸਿਰਫ਼ 3 ਗੋਲ ਖਾਧੇ ਹਨ। ਮਲੇਸ਼ੀਆ ਨੇ 14 ਗੋਲ ਕੀਤੇ ਅਤੇ 6 ਗੋਲ ਖਾਧੇ ਹਨ। ਜਾਪਾਨ ਦੇ ਖਾਤੇ ਵਿੱਚ 5 ਗੋਲ ਹਨ, ਜਦਕਿ ਉਸ ਵਿਰੁੱਧ 6 ਗੋਲ ਹੋਏ ਹਨ।

ਦੱਖਣੀ ਕੋਰੀਆ ਨੇ 5 ਗੋਲ ਕੀਤੇ ਅਤੇ 7 ਗੋਲ ਖਾਧੇ ਹਨ। ਚੀਨ ਨੇ 7 ਗੋਲ ਕੀਤੇ ਹਨ ਅਤੇ ਉਸ ਵਿਰੁੱਧ 12 ਗੋਲ ਹੋਏ ਹਨ। ਬੰਗਲਾਦੇਸ਼ ਨੇ ਸਿਰਫ਼ ਇੱਕ ਗੋਲ ਕੀਤਾ ਹੈ, ਜਦਕਿ ਉਸ ਦੀ ਟੀਮ ਵਿਰੁੱਧ 20 ਗੋਲ ਹੋ ਚੁੱਕੇ ਹਨ।

ਹੁਣ ਤੱਕ ਭਾਰਤ ਅਤੇ ਜਾਪਾਨ ਹੀ ਅਜਿਹੀਆਂ ਟੀਮਾਂ ਹਨ, ਜਿਨ੍ਹਾਂ ਨੇ ਕਿਸੇ ਇੱਕ ਮੈਚ ਵਿੱਚ ਵਿਰੋਧੀ ਟੀਮ ਨੂੰ ਕੋਈ ਗੋਲ ਨਹੀਂ ਕਰਨ ਦਿੱਤਾ। ਦੋਵਾਂ ਟੀਮਾਂ ਨੇ ਬੰਗਲਾਦੇਸ਼ ਖ਼ਿਲਾਫ਼ ਇਹ ਪ੍ਰਦਰਸ਼ਨ ਕੀਤਾ।

ਗੋਲ ਕਰਨ ਵਾਲਿਆਂ ਦੀ ਸੂਚੀ ਵਿੱਚ ਹਰਮਨਪ੍ਰੀਤ ਸਿੰਘ ਸਿਖਰ ‘ਤੇ

ਵਿਅਕਤੀਗਤ ਗੋਲ ਸਕੋਰਰਾਂ ਦੀ ਸੂਚੀ ਵਿੱਚ ਭਾਰਤੀ ਕਪਤਾਨ ਹਰਮਨਪ੍ਰੀਤ ਸਿੰਘ ਤਿੰਨ ਮੈਚਾਂ ਵਿੱਚ ਪੰਜ ਗੋਲਾਂ ਨਾਲ ਪਹਿਲੇ ਸਥਾਨ ‘ਤੇ ਹੈ। ਮਲੇਸ਼ੀਆ ਦੇ ਅਬੂ ਕਮਾਲ ਅਜ਼ਰਾਈ ਚਾਰ ਗੋਲਾਂ ਨਾਲ ਦੂਜੇ ਸਥਾਨ ‘ਤੇ ਹਨ।

ਭਾਰਤ ਦੇ ਮਨਦੀਪ ਸਿੰਘ ਅਤੇ ਅਭਿਸ਼ੇਕ ਦੇ ਨਾਲ ਮਲੇਸ਼ੀਆ ਦੇ ਅਖਿਮੁੱਲਾਹ ਅਤੇ ਅਜ਼ੀਮੁਦੀਨ ਨੇ ਤਿੰਨ-ਤਿੰਨ ਗੋਲ ਕੀਤੇ ਹਨ। ਟੂਰਨਾਮੈਂਟ ਦੀ ਹੁਣ ਤੱਕ ਦੀ ਇਕਲੌਤੀ ਹੈਟ੍ਰਿਕ ਭਾਰਤ ਦੇ ਮਨਦੀਪ ਸਿੰਘ ਨੇ ਲਗਾਈ ਹੈ। ਉਨ੍ਹਾਂ ਨੇ ਬੰਗਲਾਦੇਸ਼ ਖ਼ਿਲਾਫ਼ ਪਹਿਲੇ ਹੀ ਮੈਚ ਵਿੱਚ ਤਿੰਨ ਗੋਲ ਕੀਤੇ ਸਨ।

ਭਾਰਤ ਦੇ ਹਾਰਦਿਕ ਸਿੰਘ, ਸੁਖਜੀਤ ਸਿੰਘ, ਜੁਗਰਾਜ ਸਿੰਘ ਅਤੇ ਦਿਲਪ੍ਰੀਤ ਸਿੰਘ ਤੋਂ ਇਲਾਵਾ ਚੀਨ ਦੇ ਚੋਂਗਕੋਂਗ ਚੇਨ ਅਤੇ ਬੇਨਹਾਈ ਚੇਨ ਅਤੇ ਮਲੇਸ਼ੀਆ ਦੇ ਫੈਜ਼ਲ ਸਾਰੀ ਨੇ ਦੋ-ਦੋ ਗੋਲ ਕੀਤੇ ਹਨ।

ਇਸ ਤੋਂ ਇਲਾਵਾ 19 ਖਿਡਾਰੀਆਂ ਨੇ ਇੱਕ-ਇੱਕ ਗੋਲ ਕੀਤਾ ਹੈ। ਇਸ ਤਰ੍ਹਾਂ ਹੁਣ ਤੱਕ ਕੁੱਲ 32 ਖਿਡਾਰੀ ਗੋਲ ਕਰਨ ਵਾਲਿਆਂ ਦੀ ਸੂਚੀ ਵਿੱਚ ਆਪਣਾ ਨਾਂ ਦਰਜ ਕਰਵਾ ਚੁੱਕੇ ਹਨ।