ਲੁਧਿਆਣਾ : ਸ਼ਾਤਰ ਠੱਗਾਂ ਦੇ ਹੌਸਲੇ ਇੰਨੇ ਬੁਲੰਦ ਹੋ ਚੁੱਕੇ ਹਨ ਕਿ ਹੁਣ ਉਹ ਗ਼ਰੀਬਾਂ ਦੀ ਮਿਹਨਤ ਦੀ ਕਮਾਈ ”ਤੇ ਡਾਕਾ ਮਾਰਨ ਤੋਂ ਵੀ ਗੁਰੇਜ਼ ਨਹੀਂ ਕਰ ਰਹੇ। ਤਾਜ਼ਾ ਮਾਮਲਾ ਚੀਮਾ ਚੌਕ ਸਥਿਤ ਪੰਜਾਬ ਨੈਸ਼ਨਲ ਬੈਂਕ ਦੇ ਏ.ਟੀ.ਐੱਮ. ਦਾ ਹੈ, ਜਿੱਥੇ ਸ਼ੇਰਪੁਰ ਦੀ ਰਹਿਣ ਵਾਲੀ ਪੂਜਾ ਨਾਮਕ ਮਹਿਲਾ ਨਾਲ ਧੋਖਾਧੜੀ ਕਰਕੇ ਉਸ ਦੇ ਖਾਤੇ ਵਿੱਚੋਂ ਸਵਾ ਲੱਖ ਰੁਪਏ ਕੱਢ ਲਏ ਗਏ। ਪੀੜਤਾ ਘਰਾਂ ਵਿੱਚ ਸਾਫ਼-ਸਫ਼ਾਈ ਦਾ ਕੰਮ ਕਰਕੇ ਗੁਜ਼ਾਰਾ ਕਰਦੀ ਹੈ ਅਤੇ ਉਸ ਨੇ ਇਹ ਰਾਸ਼ੀ ਆਪਣਾ ਖ਼ੁਦ ਦਾ ਘਰ ਖ਼ਰੀਦਣ ਲਈ ਜੋੜ ਕੇ ਰੱਖੀ ਸੀ। ਪੀੜਤਾ ਪੂਜਾ ਨੇ ਦੱਸਿਆ ਕਿ ਚਾਰ ਦਿਨ ਪਹਿਲਾਂ ਜਦੋਂ ਉਹ ਨਕਦੀ ਕੱਢਵਾਉਣ ਲਈ ਏ.ਟੀ.ਐੱਮ. ਪਹੁੰਚੀ ਤਾਂ ਕੇਬਿਨ ਦੇ ਅੰਦਰ ਪਹਿਲਾਂ ਤੋਂ ਹੀ ਦੋ ਨੌਜਵਾਨ ਮੌਜੂਦ ਸਨ, ਜਦਕਿ ਉਨ੍ਹਾਂ ਦਾ ਇੱਕ ਸਾਥੀ ਬਾਹਰ ਐਕਟਿਵਾ ’ਤੇ ਨਿਗਰਾਨੀ ਕਰ ਰਿਹਾ ਸੀ।
ਜਿਵੇਂ ਹੀ ਪੂਜਾ ਨੇ ਮਸ਼ੀਨ ਵਿੱਚ ਆਪਣਾ ਕਾਰਡ ਲਗਾਇਆ, ਅੰਦਰ ਖੜ੍ਹੇ ਨੌਜਵਾਨਾਂ ਨੇ ਉਸ ਨੂੰ ਗੁੰਮਰਾਹ ਕਰਨਾ ਸ਼ੁਰੂ ਕਰ ਦਿੱਤਾ। ਉਨ੍ਹਾਂ ਨੇ ਕਿਹਾ ਕਿ ਇਹ ਮਸ਼ੀਨ ਖ਼ਰਾਬ ਹੈ ਤੇ ਉਸ ਨੂੰ ਦੂਜੀ ਮਸ਼ੀਨ ਵਰਤਣ ਲਈ ਕਿਹਾ। ਇਸੇ ਭੱਜ-ਦੌੜ ਅਤੇ ਗੱਲਾਂ ਦੇ ਜਾਲ ਵਿੱਚ ਉਲਝਾ ਕੇ ਠੱਗਾਂ ਨੇ ਨਾ ਸਿਰਫ਼ ਪੂਜਾ ਦਾ ਪਿਨ ਨੰਬਰ ਦੇਖ ਲਿਆ, ਸਗੋਂ ਬੜੀ ਚਲਾਕੀ ਨਾਲ ਉਸ ਦਾ ਏ.ਟੀ.ਐੱਮ. ਕਾਰਡ ਵੀ ਬਦਲ ਦਿੱਤਾ। ਕਾਰਡ ਹੱਥ ਵਿੱਚ ਆਉਂਦੇ ਹੀ ਲੁਟੇਰਿਆਂ ਨੇ ਜੰਮ ਕੇ ਖ਼ਰੀਦਦਾਰੀ ਕੀਤੀ। ਸ਼ਾਤਰਾਂ ਨੇ ਕਿਦਵਈ ਨਗਰ ਸਥਿਤ ਪਿੰਡੀ ਪਲਾਜ਼ਾ ਦੇ ਕੋਲ ਇੱਕ ਕੱਪੜਿਆਂ ਦੀ ਦੁਕਾਨ ਤੋਂ 20 ਹਜ਼ਾਰ ਰੁਪਏ ਦੀ ਸ਼ਾਪਿੰਗ ਕੀਤੀ ਤੇ ਫਿਰ ਡਵੀਜ਼ਨ ਨੰਬਰ 3 ਚੌਕ ਦੇ ਕੋਲ ਜੁੱਤਿਆਂ ਦੇ ਸ਼ੋਅਰੂਮ ”ਤੇ ਜਾ ਕੇ ਵੀ ਖ਼ਰੀਦਦਾਰੀ ਕੀਤੀ। ਹੱਦ ਤਾਂ ਉਦੋਂ ਹੋ ਗਈ ਜਦੋਂ ਉਹ ਦੁਕਾਨ ”ਤੇ ਕਾਰਡ ਦਾ ਪਿਨ ਭੁੱਲਣ ਦਾ ਨਾਟਕ ਕਰਦੇ ਵੀ ਨਜ਼ਰ ਆਏ। ਇਹੀ ਨਹੀਂ ਮੁਲਜ਼ਮਾਂ ਨੇ ਜਨਤਾ ਨਗਰ ਦੇ ਏ.ਟੀ.ਐੱਮ. ਤੋਂ ਕਈ ਵਾਰ ਵਿੱਚ 10-10 ਹਜ਼ਾਰ ਰੁਪਏ ਦੀ ਨਕਦੀ ਵੀ ਕੱਢਵਾਈ।
ਪੂਰੀ ਵਾਰਦਾਤ ਅਤੇ ਠੱਗਾਂ ਦੇ ਚਿਹਰੇ ਸੀ.ਸੀ.ਟੀ.ਵੀ. ਕੈਮਰਿਆਂ ਵਿੱਚ ਸਾਫ਼ ਕੈਦ ਹੋ ਗਏ ਹਨ, ਜਿੱਥੇ ਉਹ ਲੁੱਟ ਦੇ ਸਾਮਾਨ ਦੀ ਵੰਡ ਨੂੰ ਲੈ ਕੇ ਆਪਸ ਵਿੱਚ ਬਹਿਸ ਕਰਦੇ ਵੀ ਦਿਖਾਈ ਦੇ ਰਹੇ ਹਨ। ਪੀੜਤਾ ਦਾ ਕਹਿਣਾ ਹੈ ਕਿ ਸੀ.ਸੀ.ਟੀ.ਵੀ. ਵਿੱਚ ਚਿਹਰੇ ਸਾਫ਼ ਹੋਣ ਦੇ ਬਾਵਜੂਦ ਵੀ ਪੁਲਸ ਹੱਥ ”ਤੇ ਹੱਥ ਧਰ ਕੇ ਬੈਠੀ ਹੈ। ਦੂਜੀ ਪਾਸੇ ਥਾਣਾ ਡਵੀਜ਼ਨ ਨੰਬਰ 2 ਦੇ ਐੱਸ.ਐੱਚ.ਓ. ਜਸਵੀਰ ਸਿੰਘ ਦਾ ਦਾਅਵਾ ਹੈ ਕਿ ਸ਼ਿਕਾਇਤ ਮਿਲ ਚੁੱਕੀ ਹੈ ਅਤੇ ਮਾਮਲੇ ਦੀ ਗੰਭੀਰਤਾ ਨਾਲ ਜਾਂਚ ਕੀਤੀ ਜਾ ਰਹੀ ਹੈ।
