ਗੁਰਪ੍ਰੀਤ ਸਿੰਘ :- ਸਮ੍ਰਿਤੀ ਮੰਧਾਨਾ ਦੀ ਕਪਤਾਨੀ ਹੇਠ ਭਾਰਤੀ ਮਹਿਲਾ ਕ੍ਰਿਕਟ ਟੀਮ ਸ਼ੁੱਕਰਵਾਰ ਨੂੰ ਜ਼ਿੰਬਾਬਵੇ ਵਿਰੁੱਧ ਤਿੰਨ ਮੈਚਾਂ ਦੀ ਵਨਡੇ ਸੀਰੀਜ਼ ਦਾ ਪਹਿਲਾ ਮੁਕਾਬਲਾ ਖੇਡੇਗੀ। ਵਡੋਦਰਾ ਦੇ ਕੋਟੰਬੀ ਸਥਿਤ ਬੀਸੀਏ ਸਟੇਡੀਅਮ ਵਿੱਚ ਹੋਣ ਵਾਲੇ ਇਸ ਮੈਚ ਵਿੱਚ ਭਾਰਤੀ ਟੀਮ ਦੀ ਕੋਸ਼ਿਸ਼ ਸੀਰੀਜ਼ ਦੀ ਜੇਤੂ ਸ਼ੁਰੂਆਤ ਕਰਨ ਦੀ ਹੋਵੇਗੀ। ਭਾਰਤ ਨੇ ਮੰਧਾਨਾ ਦੀ ਕਪਤਾਨੀ ਦੇ ਸ਼ੁਰੂਆਤੀ ਦੌਰ ਵਿੱਚ ਜ਼ਿੰਬਾਬਵੇ ਨੂੰ ਟੀ-20 ਸੀਰੀਜ਼ ਵਿੱਚ 3-0 ਨਾਲ ਹਰਾਇਆ ਸੀ। ਹੁਣ ਮੌਜੂਦਾ ਵਨਡੇ ਵਿਸ਼ਵ ਚੈਂਪੀਅਨ ਭਾਰਤੀ ਟੀਮ ਦੀ ਨਜ਼ਰ ਇੱਕ ਵਾਰ ਫਿਰ ਸ਼ਾਨਦਾਰ ਪ੍ਰਦਰਸ਼ਨ ਕਰਨ ’ਤੇ ਹੋਵੇਗੀ।
ਇਸ ਦੌਰਾਨ ਸਾਬਕਾ ਕਪਤਾਨ ਹਰਮਨਪ੍ਰੀਤ ਕੌਰ ਦੀ ਫਾਰਮ ਵਿੱਚ ਵਾਪਸੀ ਭਾਰਤੀ ਟੀਮ ਲਈ ਅਹਿਮ ਸਾਬਤ ਹੋ ਸਕਦੀ ਹੈ। ਇਸ ਦੇ ਨਾਲ ਹੀ ਹੈਮਸਟ੍ਰਿੰਗ ਦੀ ਸੱਟ ਕਾਰਨ ਟੀਮ ਤੋਂ ਬਾਹਰ ਜੇਮਿਮਾ ਰੋਡਰਿਗਜ਼ ਦੀ ਗੈਰ-ਮੌਜੂਦਗੀ ਵਿੱਚ ਮੱਧਕ੍ਰਮ ਦੀ ਕਮੀ ਪੂਰੀ ਕਰਨਾ ਟੀਮ ਪ੍ਰਬੰਧਨ ਲਈ ਚੁਣੌਤੀ ਰਹੇਗੀ। ਟੀ-20 ਮੈਚਾਂ ਦੌਰਾਨ ਭਾਰਤ ਨੇ ਇਸ ਸਥਾਨ ਲਈ ਅਨੁਸ਼ਕਾ ਸ਼ਰਮਾ ਅਤੇ ਨਿਕੀ ਪ੍ਰਸਾਦ ਨੂੰ ਅਜ਼ਮਾਇਆ ਸੀ। ਵਨਡੇ ਸੀਰੀਜ਼ ਵਿੱਚ ਹਰਲੀਨ ਦਿਓਲ ਅਤੇ ਪ੍ਰਤਿਕਾ ਰਾਵਲ ਤੀਜੇ ਨੰਬਰ ’ਤੇ ਬੱਲੇਬਾਜ਼ੀ ਦੇ ਵਿਕਲਪ ਹੋ ਸਕਦੇ ਹਨ।
ਹਾਲਾਂਕਿ, ਇਸ ਸਥਾਨ ’ਤੇ ਬੱਲੇਬਾਜ਼ੀ ਨੂੰ ਤੇਜ਼ੀ ਦੇਣ ਲਈ ਹਰਮਨਪ੍ਰੀਤ ਦੀ ਭੂਮਿਕਾ ਅਹਿਮ ਰਹੇਗੀ। ਹਾਲੀਆ ਮੁਕਾਬਲਿਆਂ ਵਿੱਚ ਮੌਕੇ ਅਤੇ ਕ੍ਰੀਜ਼ ’ਤੇ ਸਮਾਂ ਘੱਟ ਮਿਲਣ ਦੇ ਬਾਵਜੂਦ ਉਨ੍ਹਾਂ ਨੇ ਪਿਛਲੇ ਟੀ-20 ਮੈਚ ਵਿੱਚ ਧਮਾਕੇਦਾਰ ਪਾਰੀ ਖੇਡੀ ਸੀ। ਹਰਮਨਪ੍ਰੀਤ ਨੇ ਸਿਰਫ਼ 41 ਗੇਂਦਾਂ ਵਿੱਚ 10 ਚੌਕਿਆਂ ਅਤੇ ਪੰਜ ਛੱਕਿਆਂ ਦੀ ਮਦਦ ਨਾਲ 91 ਦੌੜਾਂ ਬਣਾਈਆਂ ਸਨ।
ਕਪਤਾਨੀ ਦੀ ਵਾਧੂ ਜ਼ਿੰਮੇਵਾਰੀ ਤੋਂ ਬਿਨਾਂ ਇੱਕ ਵਿਸ਼ੇਸ਼ ਬੱਲੇਬਾਜ਼ ਵਜੋਂ ਹਰਮਨਪ੍ਰੀਤ ਦੀ ਮੌਜੂਦਗੀ ਭਾਰਤ ਦੇ ਮੱਧਕ੍ਰਮ ਨੂੰ ਮਜ਼ਬੂਤੀ ਦੇ ਸਕਦੀ ਹੈ। 50 ਓਵਰਾਂ ਦੇ ਫਾਰਮੈਟ ਵਿੱਚ ਮੱਧਕ੍ਰਮ ਨੂੰ ਤੇਜ਼ੀ ਨਾਲ ਦੌੜਾਂ ਬਣਾਉਣ ਦੀ ਲੋੜ ਰਹਿੰਦੀ ਹੈ। ਭਾਰਤ ਦੀ ਸਲਾਮੀ ਬੱਲੇਬਾਜ਼ ਸ਼ੈਫਾਲੀ ਵਰਮਾ ਦੀ ਮੌਜੂਦਾ ਫਾਰਮ ਜ਼ਿੰਬਾਬਵੇ ਲਈ ਚੁਣੌਤੀ ਬਣ ਸਕਦੀ ਹੈ। ਦੂਜੇ ਪਾਸੇ, ਗੇਂਦਬਾਜ਼ੀ ਵਿੱਚ ਸ਼੍ਰੀ ਚਰਣੀ ਦੇ ਪੂਰੇ 10 ਓਵਰ ਭਾਰਤੀ ਟੀਮ ਲਈ ਅਹਿਮ ਰਹਿਣਗੇ। ਭਾਰਤੀ ਟੀਮ ਬੱਲੇਬਾਜ਼ੀ ਅਤੇ ਗੇਂਦਬਾਜ਼ੀ ਦੋਵਾਂ ਵਿਭਾਗਾਂ ਵਿੱਚ ਸੰਤੁਲਿਤ ਪ੍ਰਦਰਸ਼ਨ ਕਰਦਿਆਂ ਸੀਰੀਜ਼ ਦੀ ਸ਼ੁਰੂਆਤ ਜਿੱਤ ਨਾਲ ਕਰਨ ਦੀ ਕੋਸ਼ਿਸ਼ ਕਰੇਗੀ।
ਭਾਰਤੀ ਟੀਮ:
ਸਮ੍ਰਿਤੀ ਮੰਧਾਨਾ (ਕਪਤਾਨ), ਯਾਸਤਿਕਾ ਭਾਟੀਆ (ਵਿਕਟਕੀਪਰ), ਹਰਲੀਨ ਦਿਓਲ, ਰਿਚਾ ਘੋਸ਼ (ਵਿਕਟਕੀਪਰ), ਪ੍ਰਤਿਕਾ ਰਾਵਲ, ਤੇਜਲ ਹਸਬਨਿਸ, ਦੀਪਤੀ ਸ਼ਰਮਾ (ਉਪ ਕਪਤਾਨ), ਹਰਮਨਪ੍ਰੀਤ ਕੌਰ, ਸਯਾਲੀ ਸਤਘਰੇ, ਸ਼ੈਫਾਲੀ ਵਰਮਾ, ਕ੍ਰਾਂਤੀ ਗੌੜ, ਰੇਣੁਕਾ ਸਿੰਘ ਠਾਕੁਰ, ਨੰਦਨੀ ਸ਼ਰਮਾ, ਸ਼੍ਰੀ ਚਰਣੀ ਅਤੇ ਵੈਸ਼ਨਵੀ ਸ਼ਰਮਾ।
ਜ਼ਿੰਬਾਬਵੇ ਦੀ ਟੀਮ:
ਜੋਸੇਫਿਨ ਨਕੋਮੋ (ਕਪਤਾਨ), ਚੀਏਜ਼ਾ ਧੁਰੁਰੂ (ਵਿਕਟਕੀਪਰ), ਸ਼ਾਰਨ ਮੇਅਰਜ਼, ਮੋਡੇਸਟਰ ਮੁਪਾਚਿਕਵਾ (ਵਿਕਟਕੀਪਰ), ਬਿਲਵਡ ਬੀਜ਼ਾ, ਨਿਆਸ਼ਾ ਗਵਾਂਜ਼ੁਰਾ, ਮਿਸ਼ੇਲ ਮਾਵੁੰਗਾ, ਚਿਪੋ ਮੁਗੇਰੀ-ਤਿਰਿਪਾਨੋ, ਕੇਲਿਸ ਨਦਲੋਵੂ, ਓਲਿੰਡਰ ਚਾਰੇ, ਕੁਡਜ਼ਾਈ ਚਿਗੋਰਾ, ਫਰਾਂਸਿਸਕਾ ਚਿਪਾਰੇ, ਤੇਂਦਾਈ ਮਾਕੁਸ਼ਾ, ਲੋਰਿਨ ਫਿਰੀ ਅਤੇ ਨੋਮਵੇਲੋ ਸਿਬਾਂਡਾ।
