ਮੁੰਬਈ – ਵਿਦੇਸ਼ਾਂ ਤੋਂ ਆਏ ਸਕਾਰਾਤਮਕ ਸੰਕੇਤਾਂ ਵਿਚਕਾਰ, ਆਟੋ ਅਤੇ ਬੈਂਕਿੰਗ ਸੈਕਟਰਾਂ ਵਿੱਚ ਖਰੀਦਦਾਰੀ ਕਾਰਨ ਘਰੇਲੂ ਸਟਾਕ ਮਾਰਕੀਟ ਸੋਮਵਾਰ ਨੂੰ ਵਾਧਾ ਦੇਖਣ ਨੂੰ ਮਿਲਿਆ ਹੈ। 30 ਸ਼ੇਅਰਾਂ ਵਾਲਾ ਬੀਐਸਈ ਸੰਵੇਦਨਸ਼ੀਲ ਸੂਚਕਾਂਕ ਸੈਂਸੈਕਸ 76.54 ਅੰਕ ਭਾਵ 0.09% ਦੇ ਵਾਧੇ ਨਾਲ 80,787.30 ਦੇ ਪੱਧਰ ‘ਤੇ ਬੰਦ ਹੋਇਆ ਹੈ। ਸੈਂਸੈਕਸ ਦੇ 14 ਸਟਾਕ ਵਾਧੇ ਨਾਲ ਅਤੇ 16 ਸਟਾਕ ਗਿਰਾਵਟ ਨਾਲ ਕਾਰੋਬਾਰ ਕਰਦੇ ਦੇਖੇ ਗਏ>
ਦੂਜੇ ਪਾਸੇ ਨੈਸ਼ਨਲ ਸਟਾਕ ਐਕਸਚੇਂਜ ਦਾ ਨਿਫਟੀ 32.15 ਅੰਕ ਭਾਵ 0.13% ਦੇ ਵਾਧੇ ਨਾਲ 24,773.15 ਦੇ ਪੱਧਰ ਤੇ ਬੰਦ ਹੋਇਆ ਹੈ। ਨਿਫਟੀ-50 ਸੂਚਕਾਂਕ ਵੀ 32.15 ਅੰਕਾਂ ਦੇ ਵਾਧੇ ਨਾਲ 24,773.15 ਅੰਕ ‘ਤੇ ਬੰਦ ਹੋਇਆ ਹੈ। ਲਗਭਗ ਸਾਰੇ ਖੇਤਰ ਹਰੇ ਰੰਗ ਵਿੱਚ ਸਨ। ਮੈਟਲ ਅਤੇ ਆਟੋ ਸਟਾਕਾਂ ਵਿੱਚ ਚੰਗੀ ਖਰੀਦਦਾਰੀ ਕਾਰਨ ਬੈਂਚਮਾਰਕ ਸੂਚਕਾਂਕ ਨੂੰ ਸਮਰਥਨ ਮਿਲਿਆ। ਆਟੋ, ਰੀਅਲਟੀ, ਮੈਟਲ, ਬੈਂਕਿੰਗ, ਫਾਰਮਾ ਅਤੇ ਤੇਲ ਅਤੇ ਗੈਸ ਕੰਪਨੀਆਂ ਦੇ ਸ਼ੇਅਰਾਂ ਵਿੱਚ ਵਧੇਰੇ ਖਰੀਦਦਾਰੀ ਰਹੀ।
ਖਾਸ ਕਰਕੇ ਆਟੋ ਸੈਕਟਰ ਵਿੱਚ, ਵਸਤੂਆਂ ਅਤੇ ਸੇਵਾਵਾਂ ਟੈਕਸ (GST) ਸੁਧਾਰਾਂ ਦੇ ਲਾਭ ਗਾਹਕਾਂ ਤੱਕ ਪਹੁੰਚਾਉਣ ਦੇ ਐਲਾਨਾਂ ਤੋਂ ਬਾਅਦ, ਨਿਵੇਸ਼ਕਾਂ ਨੂੰ ਮਾਲੀਆ ਵਧਣ ਦਾ ਭਰੋਸਾ ਹੈ। ਸੈਂਸੈਕਸ ਵਿੱਚ ਮਹਿੰਦਰਾ ਐਂਡ ਮਹਿੰਦਰਾ, HDFC ਬੈਂਕ, ਟਾਟਾ ਮੋਟਰਜ਼ ਅਤੇ ਟਾਟਾ ਸਟੀਲ ਦੇ ਸ਼ੇਅਰ ਉੱਚੇ ਪੱਧਰ ‘ਤੇ ਕਾਰੋਬਾਰ ਕਰ ਰਹੇ ਸਨ। ਭਾਰਤੀ ਏਅਰਟੈੱਲ ਅਤੇ ਏਸ਼ੀਅਨ ਪੇਂਟਸ ਦਬਾਅ ਹੇਠ ਸਨ।
ਸਟਾਕ ਮਾਰਕੀਟ ਦੇ ਅੰਕੜਿਆਂ ਅਨੁਸਾਰ, ਵਿਦੇਸ਼ੀ ਸੰਸਥਾਗਤ ਨਿਵੇਸ਼ਕਾਂ (FIIs) ਨੇ ਸ਼ੁੱਕਰਵਾਰ ਨੂੰ 1,304.91 ਕਰੋੜ ਰੁਪਏ ਦੇ ਸ਼ੇਅਰ ਵੇਚੇ, ਜਦੋਂ ਕਿ ਘਰੇਲੂ ਸੰਸਥਾਗਤ ਨਿਵੇਸ਼ਕਾਂ (DIIs) ਨੇ 1,821.23 ਕਰੋੜ ਰੁਪਏ ਦੇ ਸ਼ੇਅਰ ਖਰੀਦੇ। ਗਲੋਬਲ ਤੇਲ ਬੈਂਚਮਾਰਕ ਬ੍ਰੈਂਟ ਕਰੂਡ 1.19 ਪ੍ਰਤੀਸ਼ਤ ਵਧ ਕੇ $66.29 ਪ੍ਰਤੀ ਬੈਰਲ ‘ਤੇ ਪਹੁੰਚ ਗਿਆ।
