ਰਾਜੀਵ ਸ਼ਰਮਾ :- ਭਾਰਤੀ ਮਹਿਲਾ ਰਿਕਰਵ ਤੀਰਅੰਦਾਜ਼ੀ ਟੀਮ ਨੇ ਸ਼ੁੱਕਰਵਾਰ ਨੂੰ ਫਾਈਨਲ ਵਿੱਚ ਵਿਸ਼ਵ ਚੈਂਪੀਅਨ ਦੱਖਣੀ ਕੋਰੀਆ ਨੂੰ ਹਰਾ ਕੇ ਏਸ਼ੀਅਨ ਗੇਮਜ਼ ਵਿੱਚ ਆਪਣਾ ਪਹਿਲਾ ਗੋਲਡ ਮੈਡਲ ਜਿੱਤ ਕੇ ਨਵਾਂ ਇਤਿਹਾਸ ਰਚ ਦਿੱਤਾ ਹੈ। ਅੰਕਿਤਾ ਭਕਤ, ਕੀਰਤੀ ਸ਼ਰਮਾ ਅਤੇ ਕੁਮਕੁਮ ਮੋਹੋਦ ਦੀ ਭਾਰਤੀ ਤਿਕੜੀ ਨੇ 10 ਵਾਰ ਦੀ ਓਲੰਪਿਕ ਚੈਂਪੀਅਨ ਟੀਮ ਨੂੰ 5-3 ਨਾਲ ਮਾਤ ਦਿੱਤੀ।
ਤੇਜ਼ ਹਵਾਵਾਂ ਦੇ ਵਿਚਕਾਰ ਖੇਡੇ ਗਏ ਇਸ ਫਾਈਨਲ ਮੁਕਾਬਲੇ ਵਿੱਚ ਪਹਿਲੇ ਦੋ ਸੈੱਟ ਬਰਾਬਰੀ ‘ਤੇ ਰਹੇ। ਦੋਵਾਂ ਟੀਮਾਂ ਨੇ ਕ੍ਰਮਵਾਰ 54 ਅਤੇ 56 ਅੰਕ ਹਾਸਲ ਕਰਕੇ ਅੰਕ ਵੰਡੇ। ਤੀਜੇ ਸੈੱਟ ਵਿੱਚ ਮੌਜੂਦਾ ਵਿਸ਼ਵ ਚੈਂਪੀਅਨ ਕਾਂਗ ਚੇਯੋਂਗ, ਓਹ ਯੇਜਿਨ ਅਤੇ ਲੀ ਯੂਨਜੀ ਵਾਲੀ ਦੱਖਣੀ ਕੋਰੀਆਈ ਟੀਮ ਖੁੰਝ ਗਈ। ਕੋਰੀਆਈ ਖਿਡਾਰੀਆਂ ਨੇ ਲਗਾਤਾਰ ਤਿੰਨ ਵਾਰ 8 ਅੰਕ ਹਾਸਲ ਕੀਤੇ, ਜਿਸ ਨਾਲ ਉਨ੍ਹਾਂ ਦਾ ਕੁੱਲ ਸਕੋਰ 52 ਹੀ ਰਿਹਾ। ਇਸ ਦੇ ਉਲਟ ਭਾਰਤੀ ਤੀਰਅੰਦਾਜ਼ਾਂ ਨੇ 55 ਅੰਕ ਬਣਾ ਕੇ ਤੀਜਾ ਸੈੱਟ ਆਪਣੇ ਨਾਂ ਕੀਤਾ।
ਚੌਥੇ ਸੈੱਟ ਵਿੱਚ ਦੱਖਣੀ ਕੋਰੀਆ ਨੇ 54 ਅੰਕ ਬਣਾਏ। ਭਾਰਤ ਵੱਲੋਂ ਕੀਰਤੀ ਨੇ 8 ਅੰਕਾਂ ਨਾਲ ਸ਼ੁਰੂਆਤ ਕੀਤੀ, ਜਿਸ ਨੂੰ ਬਾਅਦ ਵਿੱਚ ਬਦਲ ਕੇ 9 ਅੰਕ ਕਰ ਦਿੱਤਾ ਗਿਆ। ਇਸ ਨਾਲ ਭਾਰਤ ਦਾ ਕੁੱਲ ਸਕੋਰ ਵੀ 54 ਹੋ ਗਿਆ ਅਤੇ ਸੈੱਟ ਡਰਾਅ ਰਹਿਣ ਨਾਲ ਭਾਰਤ ਨੇ 5-3 ਦੇ ਕੁੱਲ ਸਕੋਰ ਨਾਲ ਗੋਲਡ ਮੈਡਲ ਪੱਕਾ ਕਰ ਲਿਆ।
ਸੈਮੀਫਾਈਨਲ ‘ਚ ਚੀਨ ਨੂੰ ਦਿੱਤੀ ਸੀ ਮਾਤ
ਇਸ ਤੋਂ ਪਹਿਲਾਂ ਭਾਰਤੀ ਟੀਮ ਨੇ ਸੈਮੀਫਾਈਨਲ ਵਿੱਚ ਚੀਨ ਨੂੰ 5-1 ਨਾਲ ਹਰਾ ਕੇ ਏਸ਼ੀਅਨ ਗੇਮਜ਼ ਦੇ ਫਾਈਨਲ ਵਿੱਚ ਪਹਿਲੀ ਵਾਰ ਜਗ੍ਹਾ ਬਣਾਈ ਸੀ। ਜ਼ਿਕਰਯੋਗ ਹੈ ਕਿ ਹਾਂਗਜ਼ੂ ਵਿਖੇ ਹੋਈਆਂ 2023 ਏਸ਼ੀਅਨ ਗੇਮਜ਼ ਵਿੱਚ ਭਾਰਤੀ ਮਹਿਲਾ ਕੰਪਾਊਂਡ ਟੀਮ ਨੇ ਕਾਂਸੀ ਦਾ ਤਮਗਾ (ਬ੍ਰੋਂਜ਼ ਮੈਡਲ) ਜਿੱਤਿਆ ਸੀ।
1978 ਤੋਂ ਬਾਅਦ ਕਦੇ ਫਾਈਨਲ ਨਹੀਂ ਹਾਰੀ ਸੀ ਕੋਰੀਆਈ ਟੀਮ : ਕੋਚ
ਭਾਰਤੀ ਤੀਰਅੰਦਾਜ਼ੀ ਕੋਚ ਲੋਕੇਸ਼ ਚੰਦ ਨੇ ਦੱਸਿਆ ਕਿ ਦੱਖਣੀ ਕੋਰੀਆ 10 ਵਾਰ ਦੀ ਓਲੰਪਿਕ ਚੈਂਪੀਅਨ ਹੈ ਅਤੇ ਉਹ 1978 ਤੋਂ ਬਾਅਦ ਕਦੇ ਵੀ ਫਾਈਨਲ ਵਿੱਚ ਨਹੀਂ ਹਾਰੀ ਸੀ। ਉਨ੍ਹਾਂ ਦੱਸਿਆ ਕਿ ਭਾਰਤੀ ਟੀਮ ਬਹੁਤ ਨੌਜਵਾਨ ਹੈ, ਜਿਸ ਵਿੱਚ 26 ਸਾਲਾ ਅੰਕਿਤਾ ਸਭ ਤੋਂ ਸੀਨੀਅਰ ਖਿਡਾਰੀ ਸੀ ਅਤੇ ਉਹ ਟੀਮ ਦੀ ਅਗਵਾਈ ਕਰ ਰਹੀ ਸੀ।
