ਨੈਸ਼ਨਲ ਟਾਈਮਜ਼ ਬਿਊਰੋ :- ਸੰਵਿਧਾਨ ਸ਼ਿਲਪੀ ਬਾਬਾ ਸਾਹਿਬ ਡਾ. ਭੀਮ ਰਾਵ ਅੰਬੇਡਕਰ ਦੀ ਜਨਮ ਜੰਤੀ ਦੇ ਪਵਿੱਤਰ ਮੌਕੇ ‘ਤੇ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਵੱਲੋਂ ਹਰਿਆਣਾ ਨੂੰ ਵਿਕਾਸ ਦੀਆਂ ਬੇਹੱਦ ਵੱਡੀਆਂ ਭੇਟਾਂ ਦਿੱਤੀਆਂ ਗਈਆਂ। ਯਮੁਨਾਨਗਰ ਵਿਖੇ ਹੋਏ “ਵਿਕਸਿਤ ਭਾਰਤ–ਵਿਕਸਿਤ ਹਰਿਆਣਾ” ਸਮਾਗਮ ਦੌਰਾਨ ਉਨ੍ਹਾਂ ਨੇ 10 ਹਜ਼ਾਰ ਕਰੋੜ ਰੁਪਏ ਦੀਆਂ ਵਧੀਆ ਵਿਕਾਸ ਪਰਿਯੋਜਨਾਵਾਂ ਦਾ ਸ਼ਿਲਾਨਿਆਸ ਅਤੇ ਉਦਘਾਟਨ ਕੀਤਾ।
ਯਮੁਨਾਨਗਰ ਦੇ ਦਿਨਬੰਧੂ ਛੋਟੂ ਰਾਮ ਥਰਮਲ ਪਾਵਰ ਪਲਾਂਟ ਵਿੱਚ 8469 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣਨ ਵਾਲੀ 800 ਮੈਗਾਵਾਟ ਦੀ ਤੀਜੀ ਯੂਨਿਟ ਦੀ ਰਸਮੀ ਸ਼ੁਰੂਆਤ ਕੀਤੀ ਗਈ। ਇਨ੍ਹਾਂ ਪਰਿਯੋਜਨਾਵਾਂ ਰਾਹੀਂ ਰਾਜ ਨੂੰ ਆਪਣੇ ਘਰੇਲੂ ਬਿਜਲੀ ਉਤਪਾਦਨ ਵਿੱਚ 3382 ਮੈਗਾਵਾਟ ਤੱਕ ਦੀ ਵਾਧੂ ਸਮਰਥਾ ਮਿਲੇਗੀ। ਇਹ ਯੂਨਿਟ 233 ਏਕੜ ਜ਼ਮੀਨ ‘ਤੇ ਤਿਆਰ ਹੋਏਗੀ ਅਤੇ ਮਾਰਚ 2029 ਤੱਕ ਪੂਰੀ ਤਰ੍ਹਾਂ ਚਾਲੂ ਹੋ ਜਾਣ ਦੀ ਉਮੀਦ ਹੈ।
ਇਸੇ ਦੌਰਾਨ 90 ਕਰੋੜ ਰੁਪਏ ਦੀ ਲਾਗਤ ਨਾਲ ਯਮੁਨਾਨਗਰ ਦੇ ਮੁਕਾਰਬਪੁਰ ਵਿਖੇ ਬਣਨ ਵਾਲੇ ਗੋਬਰ-ਧਨ ਪਲਾਂਟ ਦਾ ਵੀ ਸ਼ਿਲਾਨਿਆਸ ਕੀਤਾ ਗਿਆ। ਇਹ ਪਲਾਂਟ ਸਾਲਾਨਾ 2600 ਮੈਟ੍ਰਿਕ ਟਨ ਕੰਪ੍ਰੈੱਸਡ ਬਾਇਓਗੈਸ ਤਿਆਰ ਕਰੇਗਾ ਅਤੇ 45000 ਮੈਟ੍ਰਿਕ ਟਨ ਠੋਸ ਕੂੜਾ-ਕਰਕਟ ਦਾ ਵਿਗਿਆਨਕ ਢੰਗ ਨਾਲ ਨਿਪਟਾਰਾ ਕਰੇਗਾ। ਇਸ ਤੋਂ ਇਲਾਵਾ 36000 ਮੈਟ੍ਰਿਕ ਟਨ ਗੋਬਰ ਦੀ ਵਰਤੋਂ ਵੀ ਕੀਤੀ ਜਾਵੇਗੀ, ਜਿਸ ਨਾਲ ਵਾਇੂ ਪ੍ਰਦੂਸ਼ਣ ਘਟੇਗਾ ਅਤੇ ਖੁੱਲ੍ਹੀ ਡੰਪਿੰਗ ਰੋਕੀ ਜਾ ਸਕੇਗੀ।
ਇਸੇ ਸਮਾਗਮ ਦੌਰਾਨ 1069 ਕਰੋੜ ਰੁਪਏ ਦੀ ਲਾਗਤ ਨਾਲ ਬਣੇ 14.4 ਕਿਲੋਮੀਟਰ ਲੰਬੇ ਚਾਰ ਲੇਨ ਰੇਵਾਰੀ ਬਾਈਪਾਸ ਦਾ ਉਦਘਾਟਨ ਵੀ ਕੀਤਾ ਗਿਆ। ਇਹ ਬਾਈਪਾਸ ਸ਼ਹਿਰੀ ਟ੍ਰੈਫਿਕ ਦਾ ਦਬਾਅ ਘਟਾਉਣ ਅਤੇ ਨਾਰਨੌਲ ਤੋਂ ਦਿੱਲੀ ਤੱਕ ਦੀ ਯਾਤਰਾ ਨੂੰ ਸੁਗਮ ਬਣਾਉਣ ਵੱਲ ਵੱਡਾ ਕਦਮ ਸਾਬਤ ਹੋਵੇਗਾ।
ਇਸ ਮੌਕੇ ਹਰਿਆਣਾ ਦੇ ਮੁੱਖ ਮੰਤਰੀ ਨਾਯਬ ਸਿੰਘ ਸੈਣੀ, ਕੇਂਦਰੀ ਉਰਜਾ ਮੰਤਰੀ ਮਨੋਹਰ ਲਾਲ, ਕੇਂਦਰੀ ਰਾਜ ਮੰਤਰੀ ਰਾਵ ਇੰਦਰਜੀਤ ਸਿੰਘ, ਕੇਂਦਰੀ ਸਹਿਕਾਰਤਾ ਮੰਤਰੀ ਕ੍ਰਿਸ਼ਨ ਪਾਲ, ਅਤੇ ਰਾਜ ਦੇ ਕੈਬਨਿਟ ਮੰਤਰੀ ਅਨਿਲ ਵਿਜ, ਕ੍ਰਿਸ਼ਨ ਲਾਲ ਪੰਵਾਰ ਅਤੇ ਸ਼ਿਆਮ ਸਿੰਘ ਰਾਣਾ ਵੀ ਹਾਜ਼ਰ ਰਹੇ।ਸਮਾਗਮ ਵਿੱਚ ਸੰਸਦ ਮੈਂਬਰ ਨਵੀਨ ਜਿੰਦਲ, ਰੇਖਾ ਸ਼ਰਮਾ, ਰਾਮਚੰਦਰ ਜਾਂਗੜਾ ਅਤੇ ਕਾਰਤਿਕੇ ਸ਼ਰਮਾ ਸਮੇਤ ਕਈ ਹੋਰ ਵਿਸ਼ੇਸ਼ ਮਹਿਮਾਨ ਵੀ ਸ਼ਾਮਲ ਹੋਏ।
ਇਹ ਸਮਾਰੋਹ ਨਾ ਸਿਰਫ ਹਰਿਆਣਾ ਦੇ ਵਿਕਾਸ ਨੂੰ ਨਵੀਂ ਰਫਤਾਰ ਦੇਣ ਵਾਲਾ ਸਾਬਤ ਹੋਇਆ, ਸਗੋਂ ਇਹ ਭਵਿੱਖ ਦੇ ਮਜ਼ਬੂਤ ਭਾਰਤ ਦੀ ਝਲਕ ਵੀ ਬਣਿਆ।
