ਚੰਡੀਗੜ੍ਹ, 1 ਜੂਨ: ਐਂਡੋਕਰੀਨ ਸੋਸਾਇਟੀ ਆਫ਼ ਇੰਡੀਆ (ESI) ਨੇ ਅੱਜ ਹੋਟਲ ਹਯਾਤ ਰੀਜੈਂਸੀ, ਚੰਡੀਗੜ੍ਹ ਵਿਖੇ ਮਿਡ-ਟਰਮ ESICON 2025 ਦਾ ਆਯੋਜਨ ਕੀਤਾ। ਕਾਨਫਰੰਸ ਦਾ ਉਦੇਸ਼ ਸ਼ੂਗਰ, ਮੋਟਾਪਾ ਅਤੇ ਵਾਤਾਵਰਣ ਦੇ ਮਨੁੱਖੀ ਮੈਟਾਬੋਲਿਜ਼ਮ ‘ਤੇ ਪ੍ਰਭਾਵ ਬਾਰੇ ਵਿਸਥਾਰ ਨਾਲ ਚਰਚਾ ਕਰਨਾ ਸੀ।
ਲੈਫਟੀਨੈਂਟ ਜਨਰਲ (ਡਾ.) ਨਰਿੰਦਰ ਕੋਤਵਾਲ, ਪ੍ਰਬੰਧਕੀ ਕਮੇਟੀ ਦੇ ਚੇਅਰਮੈਨ ਅਤੇ ESI ਦੇ ਰਾਸ਼ਟਰੀ ਪ੍ਰਧਾਨ, ਨੇ ਆਪਣੇ ਸੰਬੋਧਨ ਵਿੱਚ ਕਿਹਾ ਕਿ— “ਐਂਡੋਕਰੀਨ ਪ੍ਰਣਾਲੀ ਦੀ ਸਿਹਤ ਪੂਰੀ ਤਰ੍ਹਾਂ ਸਾਡੇ ਵਾਤਾਵਰਣ ‘ਤੇ ਨਿਰਭਰ ਕਰਦੀ ਹੈ। ਅੱਜ ਦੀ ਜੀਵਨ ਸ਼ੈਲੀ, ਪਲਾਸਟਿਕ ਦੀ ਵਰਤੋਂ ਅਤੇ ਹੋਰ ਵਾਤਾਵਰਣਕ ਕਾਰਕ ਸਾਡੇ ਹਾਰਮੋਨਲ ਸੰਤੁਲਨ ਨੂੰ ਬੁਰੀ ਤਰ੍ਹਾਂ ਪ੍ਰਭਾਵਿਤ ਕਰ ਰਹੇ ਹਨ।”
ਉਨ੍ਹਾਂ ਕਿਹਾ ਕਿ ਐਂਡੋਕਰੀਨੋਲੋਜੀ ਇੱਕ ਤੇਜ਼ੀ ਨਾਲ ਉੱਭਰ ਰਿਹਾ ਖੇਤਰ ਹੈ, ਜੋ ਕਿ ਕਲੀਨਿਕਲ ਸੂਝ ਅਤੇ ਅਤਿ-ਆਧੁਨਿਕ ਖੋਜ ਦਾ ਸੰਗਮ ਹੈ। ਹਾਲ ਹੀ ਦੇ ਸਾਲਾਂ ਵਿੱਚ, ਥਾਇਰਾਇਡ, ਮੋਟਾਪਾ, ਸ਼ੂਗਰ, ਹੱਡੀਆਂ ਦੀ ਸਿਹਤ ਅਤੇ ਪ੍ਰਜਨਨ ਹਾਰਮੋਨਾਂ ਨਾਲ ਸਬੰਧਤ ਖੋਜ ਨੇ ਡਾਕਟਰੀ ਪਹੁੰਚ ਨੂੰ ਇੱਕ ਨਵਾਂ ਆਯਾਮ ਦਿੱਤਾ ਹੈ।
ਡਾ. ਸਚਿਨ ਮਿੱਤਲ, ਸੰਗਠਨ ਸਕੱਤਰ, ਨੇ ਦੱਸਿਆ ਕਿ ਇੰਡੀਅਨ ਕੌਂਸਲ ਆਫ਼ ਮੈਡੀਕਲ ਰਿਸਰਚ (ICMR) ਦੇ ਅਨੁਸਾਰ, ਚੰਡੀਗੜ੍ਹ ਵਿੱਚ ਬਾਲਗ ਮੋਟਾਪਾ ਦਰ 13.6% ਹੈ, ਜੋ ਕਿ ਰਾਸ਼ਟਰੀ ਔਸਤ 11.8% ਤੋਂ ਵੱਧ ਹੈ। ਇਸ ਤੋਂ ਇਲਾਵਾ, ਰਾਸ਼ਟਰੀ ਪਰਿਵਾਰਕ ਸਿਹਤ ਸਰਵੇਖਣ ਦੇ ਅਨੁਸਾਰ, ਚੰਡੀਗੜ੍ਹ ਵਿੱਚ 15-49 ਸਾਲ ਦੀ ਉਮਰ ਵਰਗ ਦੀਆਂ 42% ਔਰਤਾਂ ਮੋਟੇ ਵਰਗ ਵਿੱਚ ਆਉਂਦੀਆਂ ਹਨ – ਜੋ ਕਿ ਦੇਸ਼ ਦੇ 26 ਰਾਜਾਂ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਵਿੱਚੋਂ ਸਭ ਤੋਂ ਵੱਧ ਹੈ।
ਇੱਕ ਹੋਰ ਅਧਿਐਨ ਦੇ ਅਨੁਸਾਰ, ਚੰਡੀਗੜ੍ਹ ਅਤੇ ਪੰਚਕੂਲਾ ਖੇਤਰ ਵਿੱਚ ਸ਼ੂਗਰ ਦੀ ਪ੍ਰਚਲਨ ਦਰ 12.67% ਹੈ, ਜਦੋਂ ਕਿ ਪ੍ਰੀ-ਡਾਇਬੀਟੀਜ਼ ਦੀ ਦਰ 11.69% ਹੈ, ਜੋ ਕਿ ਰਾਸ਼ਟਰੀ ਔਸਤ 8.8% ਤੋਂ ਬਹੁਤ ਜ਼ਿਆਦਾ ਹੈ।
ਦੇਸ਼ ਭਰ ਦੇ ਲਗਭਗ 145 ਮਾਹਰਾਂ ਨੇ ਸਮਾਗਮ ਦੌਰਾਨ ਆਯੋਜਿਤ 15 ਵਿਗਿਆਨਕ ਸੈਸ਼ਨਾਂ ਵਿੱਚ ਮੋਟਾਪਾ, ਥਾਇਰਾਇਡ, ਕਾਰਡੀਓ-ਰੇਨਲ-ਮੈਟਾਬੋਲਿਕ ਸਿਹਤ, ਬਾਲ ਅਤੇ ਕਿਸ਼ੋਰ ਐਂਡੋਕਰੀਨੋਲੋਜੀ, ਅਤੇ ਗਰਭਵਤੀ ਔਰਤਾਂ ਵਿੱਚ ਸ਼ੂਗਰ ਵਰਗੇ ਵਿਸ਼ਿਆਂ ‘ਤੇ ਵਿਚਾਰ-ਵਟਾਂਦਰਾ ਕੀਤਾ।
ਸਹਿ-ਸੰਗਠਨ ਸਕੱਤਰ ਡਾ: ਗਗਨ ਪ੍ਰਿਆ ਨੇ ਦੱਸਿਆ ਕਿ ਦਿਨ ਦੀ ਸ਼ੁਰੂਆਤ ਵਿੱਚ ਸੁਖਨਾ ਝੀਲ ‘ਤੇ ਇੱਕ ਵਾਕਾਥੌਨ ਦਾ ਆਯੋਜਨ ਕੀਤਾ ਗਿਆ ਸੀ, ਜਿਸਨੂੰ ਈਐਸਆਈ ਦੇ ਚੇਅਰਮੈਨ ਲੈਫਟੀਨੈਂਟ ਜਨਰਲ (ਡਾ:) ਨਰਿੰਦਰ ਕੋਤਵਾਲ ਨੇ ਹਰੀ ਝੰਡੀ ਦੇ ਕੇ ਰਵਾਨਾ ਕੀਤਾ। ਦੇਸ਼ ਭਰ ਦੇ ਡਾਕਟਰਾਂ ਅਤੇ ਸਥਾਨਕ ਨਾਗਰਿਕਾਂ ਨੇ ਵਾਤਾਵਰਣ ਅਤੇ ਮਨੁੱਖੀ ਸਿਹਤ ‘ਤੇ ਪਲਾਸਟਿਕ ਦੀ ਵਰਤੋਂ ਦੇ ਪ੍ਰਭਾਵ ਬਾਰੇ ਜਾਗਰੂਕਤਾ ਫੈਲਾਉਣ ਲਈ ਵਾਕਾਥੌਨ ਵਿੱਚ ਹਿੱਸਾ ਲਿਆ।
ਪੀਜੀਆਈਐਮਈਆਰ, ਚੰਡੀਗੜ੍ਹ ਦੇ ਐਂਡੋਕਰੀਨੋਲੋਜੀ ਵਿਭਾਗ ਦੇ ਮੁਖੀ ਡਾ: ਸੰਜੇ ਕੁਮਾਰ ਭਦਰਾ ਨੇ ਚਿੰਤਾ ਪ੍ਰਗਟ ਕੀਤੀ ਅਤੇ ਕਿਹਾ ਕਿ ਇਹ ਮੰਦਭਾਗਾ ਹੈ ਕਿ ਟ੍ਰਾਈਸਿਟੀ ਦੇਸ਼ ਵਿੱਚ ਸਭ ਤੋਂ ਵੱਧ ਸ਼ੂਗਰ ਦੇ ਕੇਸਾਂ ਵਾਲੇ ਖੇਤਰ ਵਜੋਂ ਉੱਭਰ ਰਿਹਾ ਹੈ।
ਪਾਰਸ ਹੈਲਥ ਦੇ ਪ੍ਰਬੰਧ ਨਿਰਦੇਸ਼ਕ ਡਾ: ਧਰਮਿੰਦਰ ਨਾਗਰ ਇਸ ਮੌਕੇ ਮੁੱਖ ਮਹਿਮਾਨ ਵਜੋਂ ਮੌਜੂਦ ਸਨ। ਉਨ੍ਹਾਂ ਕਿਹਾ, “ਦੁਨੀਆ ਭਰ ਦੇ ਐਂਡੋਕਰੀਨੋਲੋਜਿਸਟ ਲੋਕਾਂ ਦੇ ਜੀਵਨ ਅਤੇ ਸਿਹਤ ਨੂੰ ਬਿਹਤਰ ਬਣਾਉਣ ਲਈ ਵਚਨਬੱਧ ਹਨ, ਖਾਸ ਕਰਕੇ ਸ਼ੂਗਰ ਅਤੇ ਇਸ ਨਾਲ ਸਬੰਧਤ ਪੇਚੀਦਗੀਆਂ ਵਾਲੇ।”
