ਜਾਇਦਾਦ ਹੋਵੇਗੀ ਹੋਰ ਮਹਿੰਗੀ, ਅੱਜ ਐਲਾਨੇ ਜਾਣਗੇ ਨਵੇਂ ਕੁਲੈਕਟਰ ਰੇਟ, ਚੰਡੀਗੜ੍ਹ ਪ੍ਰਸ਼ਾਸਨ

ਗੁਰਪ੍ਰੀਤ ਸਿੰਘ :- ਅਗਲੇ ਵਿੱਤੀ ਸਾਲ ਲਈ ਲਾਗੂ ਹੋਣ ਵਾਲੇ ਨਵੇਂ ਕੁਲੈਕਟਰ ਰੇਟ ਪ੍ਰਸ਼ਾਸਨ ਬੁੱਧਵਾਰ ਨੂੰ ਜਾਰੀ ਕਰੇਗਾ। ਮੌਜੂਦਾ ਵਿੱਤੀ ਸਾਲ ਲਈ ਲਾਗੂ ਕੁਲੈਕਟਰ ਰੇਟ ’ਚ ਪਿਛਲੇ ਸਾਲ ਵਾਂਗ ਦੁੱਗਣਾ ਵਾਧਾ ਤਾਂ ਨਹੀਂ ਹੋਵੇਗਾ ਪਰ ਖੇਤੀਬਾੜੀ ਜ਼ਮੀਨ ਦੇ ਕੁਲੈਕਟਰ ਰੇਟ ’ਚ 40 ਫ਼ੀਸਦੀ ਤੱਕ ਦੇ ਪ੍ਰਸਤਾਵਿਤ ਵਾਧੇ ਨਾਲ ਖੇਤੀ ਯੋਗ ਜ਼ਮੀਨ ਦੇ ਰੇਟ ਕਾਫ਼ੀ ਮਹਿੰਗੇ ਹੋਣਗੇ। ਹਾਲਾਂਕਿ ਇਸ ਵਾਰ ਰਿਹਾਇਸ਼ੀ, ਵਪਾਰਕ ਤੇ ਪੇਂਡੂ ਜ਼ਮੀਨ ਦੇ ਕੁਲੈਕਟਰ ਰੇਟ ’ਚ ਸੰਭਾਵੀ 20 ਤੋਂ 30 ਫ਼ੀਸਦੀ ਤੱਕ ਦਾ ਵਾਧਾ ਪ੍ਰਸਤਾਵਿਤ ਹੈ। ਇਹ ਤੈਅ ਹੈ ਕਿ ਨਵੇਂ ਕੁਲੈਕਟਰ ਰੇਟ ਆਉਣ ਤੋਂ ਬਾਅਦ ਸ਼ਹਿਰ ’ਚ ਜਾਇਦਾਦ ਹੋਰ ਮਹਿੰਗੀ ਹੋ ਜਾਵੇਗੀ। ਪ੍ਰਸ਼ਾਸਨ ਵੱਲੋਂ ਅਗਲੇ ਸਾਲ ਲਈ ਪ੍ਰਸਤਾਵਿਤ ਕੁਲੈਕਟਰ ਰੇਟ ਦੇ ਸੰਭਾਵੀ ਵਾਧੇ ਦੇ ਮਤੇ ’ਤੇ ਇਸ ਵਾਰ ਲੋਕਾਂ ਨੇ ਜ਼ਿਆਦਾ ਨਾਰਾਜ਼ਗੀ ਨਹੀਂ ਪ੍ਰਗਟਾਈ ਸੀ ਪਰ ਉਦਯੋਗਿਕ, ਵਪਾਰਕ ਤੇ ਰਿਹਾਇਸ਼ੀ ਜ਼ਮੀਨ ਦੇ ਕੁਲੈਕਟਰ ਰੇਟ ’ਚ ਕਮੀ ਦੀ ਗੱਲ ਜ਼ਰੂਰੀ ਉਠਾਈ ਸੀ। ਪ੍ਰਸ਼ਾਸਨ ਵੱਲੋਂ ਜਾਇਦਾਦਾਂ ਦੇ ਕੁਲੈਕਟਰ ਰੇਟ ਸੋਧਣ ਦੇ ਮਤੇ ਨੂੰ ਮਨਜ਼ੂਰ ਕਰ ਦਿੱਤਾ ਹੈ ਤੇ ਇਹ ਬੁੱਧਵਾਰ ਨੂੰ ਜਾਰੀ ਕੀਤੇ ਜਾਣਗੇ। ਕੁਲੈਕਟਰ ਰੇਟ 1 ਅਪ੍ਰੈਲ ਤੋਂ ਲਾਗੂ ਹੋਣਗੇ।

ਪਿਛਲੇ ਤਜੁਰਬੇ ਤੋਂ ਲਿਆ ਸਬਕ

ਪ੍ਰਸ਼ਾਸਨ ਨੇ ਹਰ ਕੈਟੇਗਰੀ ’ਚ ਆਉਣ ਵਾਲੀ ਜਾਇਦਾਦ ਦੇ ਕੁਲੈਕਟਰ ਰੇਟ ’ਚ ਭਾਰੀ ਵਾਧਾ ਕੀਤਾ ਸੀ। ਰਿਹਾਇਸ਼ੀ ਜਾਇਦਾਦਾਂ ਦੇ ਕੁਲੈਕਟਰ ਰੇਟ ਢਾਈ ਗੁਣਾ ਤੱਕ ਵੱਧਾ ਦਿੱਤੇ ਗਏ ਸਨ ਪਰ ਇਸ ਵਾਰ ਇੰਨਾ ਵਾਧਾ ਪ੍ਰਸਤਾਵਿਤ ਨਹੀਂ ਹੈ। ਜਾਇਦਾਦ ਦੇ ਰੇਟ ਪਹਿਲਾਂ ਹੀ ਮੋਹਾਲੀ ਤੇ ਪੰਚਕੂਲਾ ਨਾਲੋਂ ਵੱਧ ਹਨ। ਲੋਕਾਂ ਦੀ ਮੰਗ ਦੇ ਬਾਵਜੂਦ ਪਿਛਲੇ ਸਾਲ ਰਿਹਾਇਸ਼ੀ ਜਾਇਦਾਦਾਂ ਸਮੇਤ ਹਰ ਤਰ੍ਹਾਂ ਦੀ ਜਾਇਦਾਦਾਂ ਦੇ ਕੁਲੈਕਟਰ ਰੇਟ ’ਚ ਭਾਰੀ ਵਾਧਾ ਕੀਤਾ ਸੀ।
ਇਸੇ ਕਾਰਨ ਸ਼ਹਿਰ ’ਚ ਪ੍ਰਾਪਰਟੀ ਕਾਰੋਬਾਰ ਕਰਨ ਦੀ ਬਜਾਏ ਲੋਕਾਂ ਨੇ ਮੋਹਾਲੀ ਜਾਂ ਪੰਚਕੂਲਾ ’ਚ ਨਿਵੇਸ਼ ਕਰਨਾ ਬਿਹਤਰ ਸਮਝਿਆ। ਇਸ ਤੋਂ ਸਬਕ ਲੈਂਦਿਆਂ ਇਸ ਵਾਰ ਪ੍ਰਸ਼ਾਸਨ ਨੇ ਪਿਛਲੇ ਸਾਲ ਜਿੰਨਾ ਵਾਧਾ ਨਹੀਂ ਕੀਤਾ ਹੈ। ਹਾਲਾਂਕਿ ਸ਼ਹਿਰ ’ਚ ਰਿਹਾਇਸ਼ੀ ਜਾਇਦਾਦਾਂ ਨੂੰ ਸੈਕਟਰ ਵਾਈਜ਼ 4 ਹਿੱਸਿਆਂ ’ਚ ਵੰਡਣ ਦੀ ਬਜਾਏ ਜਨਤਾ ਦੀ ਮੰਗ ਸੀ ਕਿ ਇਸ ਨੂੰ ਜਾਂ ਤਾਂ ਦੋ ਹਿੱਸਿਆਂ ’ਚ ਕਰ ਦਿੱਤਾ ਜਾਵੇ ਜਾਂ ਘੱਟੋ-ਘੱਟ ਤਿੰਨ ਹਿੱਸਿਆਂ ’ਚ ਵੰਡ ਕੇ ਕੁਲੈਕਟਰ ਰੇਟ ਤੈਅ ਕੀਤੇ ਜਾਣ ਪਰ ਲੋਕਾਂ ਦੀ ਇਸ ਮੰਗ ਨੂੰ ਪ੍ਰਸ਼ਾਸਨ ਨੇ ਹਾਲੇ ਵੀ ਨਹੀਂ ਸੁਣਿਆ ਹੈ।