ਬਰਲਿਨ/ਮਾਸਕੋ: ਜਰਮਨੀ ਦੀ ਸਭ ਤੋਂ ਵੱਡੀ ਏਅਰਲਾਈਨ ਲੁਫਥਾਂਸਾ ਵਿੱਚ ਚੱਲ ਰਹੀ ਹੜਤਾਲ ਕਾਰਨ ਹਵਾਈ ਸੇਵਾਵਾਂ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈਆਂ ਹਨ। ਹੜਤਾਲ ਦੇ ਪਹਿਲੇ ਹੀ ਦਿਨ 700 ਤੋਂ ਵੱਧ ਉਡਾਣਾਂ ਰੱਦ ਕਰ ਦਿੱਤੀਆਂ ਗਈਆਂ ਹਨ, ਜਿਸ ਕਾਰਨ ਯਾਤਰੀਆਂ ਨੂੰ ਭਾਰੀ ਮੁਸ਼ਕਿਲਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।
ਵੇਰੇਨੀਗੁੰਗ ਕਾਕਪਿਟ ਯੂਨੀਅਨ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਇਹ ਹੜਤਾਲ 13 ਅਤੇ 14 ਅਪ੍ਰੈਲ ਲਈ ਬੁਲਾਈ ਗਈ ਸੀ। ਇਸ ਹੜਤਾਲ ਵਿੱਚ ਲੁਫਥਾਂਸਾ ਤੋਂ ਇਲਾਵਾ ਇਸ ਦੇ ਕਾਰਗੋ ਵਿੰਗ, ਸਿਟੀਲਾਈਨ ਅਤੇ ਯੂਰੋਵਿੰਗਜ਼ ਦੇ ਪਾਇਲਟ ਵੀ ਸ਼ਾਮਲ ਹਨ। ਜ਼ਿਕਰਯੋਗ ਹੈ ਕਿ ਇਸ ਸਾਲ ਫਰਵਰੀ ਅਤੇ ਮਾਰਚ ਵਿੱਚ ਵੀ ਪਾਇਲਟਾਂ ਅਤੇ ਫਲਾਈਟ ਅਟੈਂਡੈਂਟਾਂ ਵੱਲੋਂ ਕੀਤੀ ਗਈ ਹੜਤਾਲ ਕਾਰਨ ਜਰਮਨੀ ਦੇ ਮੁੱਖ ਸ਼ਹਿਰਾਂ ਵਿੱਚ ਸੈਂਕੜੇ ਉਡਾਣਾਂ ਰੱਦ ਹੋਈਆਂ ਸਨ।
ਕਿਉਂ ਹੋ ਰਹੀ ਹੈ ਹੜਤਾਲ?
ਯੂਨੀਅਨ ਦੇ ਨੁਮਾਇੰਦਿਆਂ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਪ੍ਰਬੰਧਕਾਂ ਨਾਲ ਗੱਲਬਾਤ ਲਈ ਤਿਆਰ ਹਨ, ਪਰ ਇਹ ਤਾਂ ਹੀ ਸੰਭਵ ਹੈ ਜੇਕਰ ਕਰਮਚਾਰੀਆਂ ਦੀਆਂ ਤਨਖਾਹਾਂ ਅਤੇ ਪੈਨਸ਼ਨ ਸਬੰਧੀ ਮੰਗਾਂ ‘ਤੇ ਕੋਈ ‘ਉਚਿਤ ਪ੍ਰਸਤਾਵ’ ਪੇਸ਼ ਕੀਤਾ ਜਾਵੇ। ਯੂਨੀਅਨ ਨੇ ਯਾਤਰੀਆਂ ਨੂੰ ਹੋ ਰਹੀ ਅਸੁਵਿਧਾ ਅਤੇ ਗਰਾਊਂਡ ਸਟਾਫ ‘ਤੇ ਵਧੇ ਦਬਾਅ ਲਈ ਅਫਸੋਸ ਪ੍ਰਗਟਾਇਆ ਹੈ, ਪਰ ਨਾਲ ਹੀ ਇਹ ਵੀ ਕਿਹਾ ਹੈ ਕਿ ਮਾਲਕਾਂ ‘ਤੇ ਦਬਾਅ ਬਣਾਉਣ ਲਈ ਹੜਤਾਲ ਇੱਕ ਜ਼ਰੂਰੀ ਸਾਧਨ ਹੈ।
