ਨੈਸ਼ਨਲ ਟਾਈਮਜ਼ ਬਿਊਰੋ :- ਕਨਜ਼ਰਵੇਟਿਵ ਪਾਰਟੀ ਦੇ ਆਗੂ ਪਿਅਰ ਪੋਇਲੀਏਵਰ ਵਲੋਂ ਆਉਣ ਵਾਲੇ ਸ਼ੁੱਕਰਵਾਰ, 25 ਅਪ੍ਰੈਲ ਨੂੰ ਕੈਲਗਰੀ ਵਿਖੇ ਇੱਕ ਵੱਡੀ ਚੋਣ ਰੈਲੀ ਦਾ ਆਯੋਜਨ ਕੀਤਾ ਜਾ ਰਿਹਾ ਹੈ। ਇਹ ਰੈਲੀ 235 ਐਰੋ ਵੇ ਨੌਰਥਈਸਟ ਤੇ ਹੋਵੇਗੀ, ਜਿਸ ਲਈ ਦਰਵਾਜ਼ੇ ਦੁਪਹਿਰ 12:30 ਵਜੇ ਖੁੱਲ ਜਾਣਗੇ। ਇਹ ਦੌਰਾ ਪੋਇਲੀਏਵਰ ਲਈ ਪੱਛਮੀ ਕੈਨੇਡਾ ਵਿਚ ਵੋਟਰਾਂ ਨਾਲ ਜੁੜਨ ਦੇ ਉਦੇਸ਼ ਨਾਲ ਕੀਤੀ ਜਾ ਰਹੀ ਮੁਹਿੰਮ ਦਾ ਇਕ ਅਹਿਮ ਹਿੱਸਾ ਹੈ। ਕੇਂਦਰੀ ਸਰਕਾਰ ਦੀਆਂ ਨੀਤੀਆਂ ਦੀ ਸਖ਼ਤ ਆਲੋਚਨਾ ਕਰਨ ਅਤੇ ਆਰਥਿਕ ਮੁੱਦਿਆਂ ’ਤੇ ਕੇਂਦਰਤ ਰਹਿਣ ਵਾਲੇ ਪੋਇਲੀਏਵਰ ਆਪਣੀ ਰੈਲੀ ਵਿਚ ਮਹਿੰਗਾਈ, ਰਹਿਣ-ਸਹਿਣ ਦੀ ਲਾਗਤ ਅਤੇ ਊਰਜਾ ਖੇਤਰ ਸੰਬੰਧੀ ਨੀਤੀਆਂ ’ਤੇ ਗੱਲ ਕਰਨਗੇ। ਉਨ੍ਹਾਂ ਦੇ ਭਾਸ਼ਣ ਦਾ ਕੇਂਦਰੀ ਮੁੱਦਾ ਇਹ ਹੋਵੇਗਾ ਕਿ ਜੇਕਰ ਉਹ ਚੁਣੇ ਜਾਂਦੇ ਹਨ ਤਾਂ ਉਹ ਕੇਂਦਰੀ ਇਲੈਕਟ੍ਰਿਕ ਵਾਹਨ ਵਿਕਰੀ ਨੀਤੀ ਨੂੰ ਰੱਦ ਕਰਨਗੇ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਇਹ ਨੀਤੀ ਐਲਬਰਟਾ ਵਰਗੇ ਪਰੰਪਰਾਗਤ ਊਰਜਾ ਉੱਤੇ ਨਿਰਭਰ ਪ੍ਰਾਂਤਾਂ ਲਈ ਨੁਕਸਾਨਦਾਇਕ ਹੈ।
ਚੋਣਾਂ ਨਜ਼ਦੀਕ ਆ ਰਹੀਆਂ ਹਨ ਅਤੇ ਪੋਇਲੀਏਵਰ ਦੀ ਟੀਮ ਐਲਬਰਟਾ ਵਿਚ ਵੋਟਰਾਂ ਨੂੰ ਉਤਸ਼ਾਹਿਤ ਕਰਕੇ ਮਜ਼ਬੂਤ ਹਮਾਇਤ ਇਕੱਠੀ ਕਰਨ ਦੀ ਕੋਸ਼ਿਸ਼ ਕਰ ਰਹੀ ਹੈ ਜੋ ਕਿ ਕਨਜ਼ਰਵੇਟਿਵ ਪਾਰਟੀ ਲਈ ਇੱਕ ਵੱਡਾ ਗੜ੍ਹ ਮੰਨਿਆ ਜਾਂਦਾ ਹੈ।
